Shtohen 22 raste të reja, shkon në 584 numri i të prekurve me COVID-19 në Shqipëri

Shkon në 584 numri i të prekurve në Shqipëri nga COVID-19.

22 raste të reja janë konfirmuar në 24 orët e fundit, ndërsa ka shkuar në 327 numri i të shëruarëve.

“Gjatë 24 orëve të fundit janë testuar 233 persona të dyshuar me COVID-19. Nga rezultatet e testimeve janë konfirmuar 22 raste pozitive. Nga rastet e reja 3 janë në Shkodër, 2 raste në Tiranë. Ndërkohë vijon hetimi epidemiologjik dhe gjurmimi i kontakteve në vatrën e Krujës ku kanë rezultuar pozitivë 5 persona dhe në Kurbin ku kemi 12 raste të reja. Deri në këto momente janë testuar 5,775 raste të dyshuara dhe prej tyre 584 janë të konfirmuar pozitivë me COVID-19”, tha Eugena Tomini nga Instituti i Shëndetit Publik.

Gjatë 24 orëve të fundit, 13 pacientë të tjerë i janë shtuar listës së të shëruarëve, duke e çuar numrin në 327.

“Aktualisht në vendin tonë janë 231 persona të infektuar aktivë. Përqindja e të shëruarëve është më e lartë krahasuar me të infektuarit aktivë dhe kjo tendencë tashmë vazhdon pa luhatje prej më shumë se një jave. Deri sot, 26 qytetarë e kanë humbur betejën me këtë sëmundje me gjithë përpjekjet e stafit mjekësor”, njofton Tomini. /Telegrafi/