Shpëtim Duro e ofron dorëheqjen dhe kryesia e Dritës ia pranon atë: Nuk u arrit objektivi i vetëm që patëm

Drita është eliminuar nga Digitalb Kupa e Kosovës në çerekfinale.

Kampioni në fuqi i Kosovës është eliminuar nga Vëllaznimi duke pësuar humbje 1-0.

Gjilanasit e kishin objektiv të vetëm Kupën e Kosovës dhe në momentin që u eliminuan, trajneri i ardhur Shpëtim Duro ka ofruar dorëheqjen.

Këtë për Telegrafin e ka konfirmuar zëvendës drejtori i klubit gjilanas, Valon Zymberi.

“Drita ka pasur objektivin e vetëm Kupën e Kosovës dhe ky objektiv ka qenë edhe i profesor Shpëtim Duros”.

“Pas eliminimit nga Kupa e Kosovës, profesori e ka ofruar dorëheqjen pasi më nuk kishte objektiva me klubin”.

“Pas konsultimit të bordit me kryetarin kemi rënë dakord që ta pranojmë dorëheqjen e Duros”, ka thënë Zymberi për Telegrafin.

Dy palët janë ndarë me marrëveshje, duke lënë mundësinë e bashkëpunimit edhe në të ardhmen.

“Jemi ndarë me marrëveshje me profesor Duron, por duke lënë mundësinë e bashkëpunimit edhe në të ardhmen. Ai ka qenë shumë profesionist dhe korrekt me ne ashtu si edhe ne që jemi treguar korrekt me të”, u shpreh Zymberi.

Vendin e Duros do ta marrë ndihmësi i tij Ardian Nuhiu.

“Kemi vendosur që pozitën e trajnerit ta marrë ndihmësi i deritashëm i Duros, Ardian Nuhiu”, tha Zymberi.

Ndryshe Drita përveç eliminimit nga Kupa e Kosovës, ka mbetur edhe mbrapa në luftën për titullin e kampionit. /Telegrafi/