Shmangni një gabim të zakonshëm kur pastroni me fshesë elektrike pasi mund ta dëmtoni pajisjen

Për shumë njerëz, një fshesë elektrike është një nga ato pajisje që thjesht nuk mund të jetojnë pa të.

Pajisja largon menjëherë thërrimet, pluhurin dhe qimet, duke u bërë një pajisje e domosdoshme për miliona njerëz në mbarë botën, të cilët e përdorin çdo ditë.

Megjithatë, markat e njohura të fshesave me korent zakonisht nuk janë të lira, ndaj është e rëndësishme ta ruani pajisjen sa më gjatë që të jetë e mundur, shkruan Express.co.uk.

Ekspertët paralajmërojnë se ka një gjë që nuk duhet ta pastroni kurrë me fshesën me korent, pasi mund të dëmtojë pajisjen dhe të çojë në riparime të kushtueshme.

Gjegjësisht ekspertët nga Which kanë ndarë disa këshilla rreth përdorimit të fshesave me korent, të bazuara në sugjerimet e një specialisteje, e cila thotë se “kurrë nuk do ta bënte këtë gjë”.

Në një postim në Instagram, ekspertja e fshesave me korent këshilloi fuqimisht që të mos përdorni pajisjen për të pastruar qelqin e thyer në dysheme.

Edhe pse ky është një incident i zakonshëm dhe mund të jetë tundues të përdorni fshesën për të hequr shpejt copëzat e rrezikshme, ekspertja e quan këtë një gabim të madh.

Ajo paralajmëron: “Copëzat e vogla mund të bllokohen në tub ose të dëmtojnë motorin”.

Si ta pastroni qelqin e thyer në mënyrë të sigurt?

Nëse ju bie një gotë apo një filxhan, mos përdorni fshesën me korent për të pastruar rrëmujën. Në vend të kësaj, përdorni këto metoda për largimin e tyre.

Përdorni një fshesë dore për të mbledhur copëzat e mëdha;

Përdorni një leckë të lagur për të mbledhur fragmentet e vogla, duke e shtypur lehtë në zonën ku ka rënë qelqi – copëzat e imëta do të ngjiten menjëherë në të.

Pasi të keni mbledhur sa më shumë qelq të jetë e mundur, atëherë mund të përdorni fshesën me korent, por vetëm pasi të jeni të sigurt që pjesët më të mëdha janë larguar. Kjo do të zgjasë jetën e pajisjes suaj dhe do t’ju ndihmojë të shmangni shpenzime të panevojshme për riparime.

Gjithashtu, para se të përdorni fshesën me korent, kontrolloni me kujdes grykën e saj për ndonjë objekt të ngecur, pasi kjo mund të ndikojë në efikasitetin e saj. /Telegrafi/