Shitësit e Bitpazarit me protesta kundërshtojnë tarifën e shtrenjtë të blerjes së dyqaneve (Video)

Shitësit e Bit Pazarit ndjehen të tradhtuar nga ndërmarrja “Skopski Pazar”, e cila i ka detyruar të blejnë dyqanet e tyre edhe atë me çmime të larta. Shitësit thonë se ndërmarrja po shkel premtimin se dyqanet nuk do të shiten por do të vazhdojnë të jepen me qera. Përmes protestave si kjo e sotmja, ata i kundërvihen ultimatumit të ndërmarrjes “Skopski Pazar”, i cili, siç thonë shitësit, u rrezikon bukën e gojës.

”I kemi pasur, 30 vjet dyqanet, sot çohet azgani edhe thotë unë e blej, e shes. Ne kemi dhënë votë për me na dhënë bukë, jo për me na marrë bukën. Ne speca shesim , o vlla nuk shesim dukat, 30 mijë – 40 mijë euro nuk mund ti gjejmë, sa i duhen pare atij ne nuk mund t’i gjejmë,” thonë tregëtarët.

Me këto fjalë, tregtarët e Bitpazarit, protestuan sot për të mbrojtur kafshatën e gojës. Kjo si rezultat i afatit që u është dhënë nga autoritetet që nëse deri të hënën nuk dëshirojnë t’i blejnë dyqanet që i posedojnë me qera, atëherë do duhet t’i lëshojnë ato.

Tregtarët kërkojnë mbështetje edhe nga Qeveria, pasi, siç thonë, ata Qeveria u ka premtuar jetë më të lumtur dhe jo të këtillë.

Siç thonë tregtarët, atyre nuk ju intereson politika, por vetëm zgjidhja e problemit të tyre. Ata thonë se protesta e sotme ishte vetëm fillimi, ndërsa, nëse autoritetet nuk tërhiqen nga ky vendim, atëherë do të vazhdojnë edhe në mënyrë më masive të protestojnë para të gjitha institucioneve të shtetit.