SHGM: Dënojmë trysninë që bën Osmani ndaj mediave

Shoqata e Gazetarëve të Maqedonisë (SHGM) përmes një kumtese me shkrim ka reaguar ndaj deklaratave të zv.kryeministrit Bujar Osmani, i cili gjatë ditës së djeshme tha se do të paditë mediumet që skandalin në Fondin pensional e lidhin me BDI-në.

Nga SHGM thonë se zyrtarët publikë, veçanërisht ministrat, duhet të përmbahen nga deklaratat që mund të perceptohen si kërcënime apo etiketime të mediave. Sipas tyre, mënyra e tillë e komunikimit nuk mund të ndikojë në profesionalizimin e mediave, njofton Telegrafi Maqedoni.

“Zv.kryeministri Bujar Osmani duke folur për skandalin në Fondin pensional, u kërcënua se do të padisë të gjitha mediat që kanë lidhur këtë skandal me Bashkimin Demokratik për Integrim. Theksojmë se është punë e mediave të hetojnë dhe të shprehin dyshime për të gjithë zyrtarët, pavarësisht cilës parti i takojnë ato, ndërsa përfaqësuesit e qeverisë, në këtë rast zëvendëskryeministri i detyruar për euro-integrime, duhet të përmbahen nga kërcënime me padi në frymën e fjalës së lirë për të cilën ato deklarativisht angazhohen”, thonë nga SHGM, duke shtuar se çdo mosmarrëveshje duhet të zgjidhet nëpërmjet transparencës, e jo me kërcënime për padi.

Ndryshe, ditë më parë ministrja e Punës dhe Politikës Sociale Milla Carovska, zbuloi se për dhjetë vite me radhë, rreth 12 mijë të punësuarve nuk u është paguar sigurimi pensional në shtyllën e dytë./Telegrafi/