Sherifi thirrje LVV-së: Mos tentoni të vjedhni mandatet e koalicionit NISMA-AKR-PD

NISMA Socialdemokrate ka mbajtur një konferencë për media ku kanë shprehur shqetësimin për qëndrimet e Lëvizjes Vetëvendosje lidhur me votat e ardhura nga Serbia.

Sekretari i NISMA-së, Bilall Sherifi, ka thënë se përfaqësuesit e Lëvizjes Vetëvendosje nuk po paraqesin asgjë më shumë sesa vazhdimin e të keqes në variantin e tyre.

“Përderisa Vetëvendosja ishte e kënaqur me 29 mandatet që ia ka dhanë populli i refuzonte këto vota duke thënë që janë të paligjshme. Në momentin kur e pa që përmes këtyre votave mund të grabis mandate të NISMA-s ajo hoqi maskën. Nga patriot doli grabitçar. Dëshirojnë të grabisin mandatet që kanë dalë nga 42 mijë votues të Republikës së Kosovës të rregullta. Pra 42 mijë vota të rregullta përball 3104 votave kriminale. Ata i duan ato vota sepse duan të grabisin”, ka thënë ai duke përmendur vendimin e PZAP-së.

“Vendimi i PZAP-ës thotë në rastin konkret për shkak të konstsatitmit të mënyrës së vendimit, pakot e fletëvotimeve nga Serbia janë dërguar fizikisht në fahun postal. Nuk kemi dërgim por dorëzim gjë që në rastin konkret nuk kemi postën dërguese, por vetëm atë pranuese. Duke marr përbazë këtë të njëjtat nuk mund të kategorizohen si fletëvotime nga jashtë dhe të tillat konsiderohen të pavlefshme. Pra këtë e kanë thënë edhe përfaqësuesit e LVV-së në KQZ që këto vota janë të paligjshme. Ndërsa tani ndërruan qëndrim dhe thonë se PZAP ka bërë pazar”, është shprehur Sherif, përcjell Telegrafi.

Sherifi në këtë konferencë ka thënë se LVV po kërkon që përmes këtyre vota të vjedh tre mandate.

“Presioni që është duke ushtruar mbi PZAP-në, Vetëvendosje, është një mesazh që po përpiqen t’i dërgojnë Gjyjkatës Supreme për t’i frikësuar. Por, kjo nuk do të kalojë sepse mandatet tona nuk do të na i vjedh askush. Jemi të zhgënjyer për faktin se përderisa ata po përpiqen të paraqiten si shpresë, duan të fillojnë me hajni. I bëjmë thirrje LVV-së të heqin dorë nga kjo tendencë për të grabitur mandatet e koalicionit NISMA-AKR-PD. Këto mandate i takojnë qytetarëve të Kosovës të 42 mijë votuesve. Ne si koalicion mbesim të përkushtuar në mbrojtje të ligjit”, është shprehur ai.

Ndryshe përfaqësuesi i Lëvizjes Vetëvendosje në Komisionin Qendror të Zgjedhjeve, Adnan Rrustemi ka thënë se tre kandidatët e LVV-së për deputetë kanë bërë ankesë në Gjykatën Supreme kundër vendimit të PZAP-it.

Lexo po ashtu Rrustemi: Tre kandidatët e LVV-së për deputetë janë ankuar në Gjykatën Supreme kundër vendimit të PZAP-it

Rrustemi ka thënë se vendimet e PZAP-it nuk kanë të bëjnë asgjë me procesin zgjedhor, por siç ka shkruar ai ata duan zvogëlimin e deputetëve të LVV-së./Telegrafi/