SHBA me paketë të re humanitare prej 700 milionë dollarësh për Ukrainën

Shtetet e Bashkuara do t’i ofrojnë Ukrainës 700 milionë dollarë ndihmë humanitare për të mbështetur ukrainasit e zhvendosur, rrjetin e energjisë në Ukrainë dhe përpjekjet e çminimit, njoftoi në Kiev më 11 shtator Sekretari amerikan i Shtetit, Antony Blinken.

Blinken dhe Sekretari i Jashtëm i Mbretërisë së Bashkuar, David Lammy, mbërritën në Ukrainë më 11 shtator për t’u takuar me presidentin Volodymyr Zelensky dhe zyrtarë të tjerë të lartë ukrainas, transmeton Telegrafi.

SHBA do të sigurojë 325 milionë dollarë për të ndihmuar në riparimin e infrastrukturës energjetike të Ukrainës, e cila kërkon forcimin përpara dimrit dhe pritshmëritë për një fushatë të rinovuar të sulmeve ruse.

Paketa përfshin gjithashtu 290 milionë dollarë ndihmë humanitare, e cila do të mbështesë “miliona njerëz në Ukrainë dhe rajonin përreth, të cilët janë detyruar të largohen nga shtëpitë e tyre”, tha Blinken.

102 milionë dollarë të tjera do të shkojnë për financimin e çminimit humanitar “për të ndihmuar në heqjen e minave tokësore dhe municioneve të pashpërthyera që Rusia ka lënë pas në të gjithë Ukrainën. /Telegrafi/