Selmanaj: Edhe skeptikët po binden se në Shtëpinë e Bardhë nuk bëhet shaka dhe marrëveshjet e arritura aty realizohen

Zëvendëskryeministri i Kosovës, Driton Selmanaj i ftuar në “Përballje”, me kryeredaktorin e Telegrafit, Muhamet Hajrullahu ka folur për marrëveshjet e arritura në Shtëpinë e Bardhë dhe në Prishtinë, për kritikat e opozitës në lidhje me këto marrëveshje, për marrëdhëniet me partnerin e koalicionit, Aleancën për Ardhmërinë e Kosovës dhe për zgjedhjen e Presidentit të Kosovës.

Selmanaj foli edhe delegacionin amerikan i cili erdhi në Kosovë, ndërsa u shpreh se vizita e tyre dhe marrëveshja në Prishtinë ishte vazhdimësi e marrëveshjes së arritur në Washington.

Ai tha se kjo vizitë tregon seriozitetin e marrëveshjes dhe se ajo që arrihet në Shtëpi të Bardhë realizohet dhe merret shumë seriozisht.

“Marrëveshja në Prishtinë, nuk mund të shihet kjo si e ndarë prej marrëveshjes që u arrit në Washington. Kjo ka qenë hapi i radhës i konkretizimit të marrëveshjes së Washingtonit, ka qenë përkushtim i tyre që të dëshmohet se kjo çështje nuk ka qenë vetëm deklarative, nuk ka qenë vetëm zotim politik në shtëpinë e bardhë, por që kjo çështje është marrë shumë seriozisht”, tha Selmanaj.

Ai tha se tashmë edhe skeptikët po binden se në Shtëpinë e Bardhë nuk bëhet shaka.

“Edhe skeptikët tashmë besoj se po e binden se në Shtëpinë e Bardhë nuk bëhet shaka dhe se marrëveshjet që arrihen aty është përkushtim i tyre që ato pastaj të realizohen dhe prezenca e tyre në këtu është hapi i dytë, i radhës që pas Washingtonit, të shkohet në konkretizimin e saktë të çdo pike që ne i kemi arritur në marrëveshje. “Ne muajin tjetër ne presim inxhinierë profesionistë, të fushave të caktuara që do të vijnë në Kosovë për të filluar më pas edhe fizibilitetin”, u shpreh Selmanaj. /Telegrafi/