Selimi: Veteranët nuk e meritojnë të përfshihen në listë të njëjtë me manipulatorët

Deputeti nga radhët e Lëvizjes Vetëvendosje, Rexhep Selimi në një konferencë për media ka folur për listat e veteranëve të UÇK-së, duke thënë se që nga miratimi i ligjit për veteranët ka pasur shumë parregullsi.

Selimi ka thënë se edhe procesi i verifikimit të veteraneve ka qenë i politizuar duke theksuar se kanë ndërhyre partitë politike.

“Ka ndodhur edhe shkelja e procedurave të rregullores së komisionit, pasi që sipas saj, çdo aplikacion para se të dorëzohej te aplikuesi duhet të nënshkruhet nga komisioni, mirëpo asnjë nga më shumë se 46 mijë aplikacionet nuk është nënshkruar. Gjatë shpërndarjes së çeritifikatave ka pasur shkelje të protokollit, këto çertifikatat janë shpërndarë nëpër fushata elektorale, nëpër kafene etj”, ka thënë Selimi.

Ai ka shtuar se vendimi i kryeministrit që t’ua ndalë pensionet veteranëve është i padrejtë.

“Në vend që të korrigjohen këto gabime, ndodh ndëshkimi kolektiv, duke i përfshirë edhe ata që e meritojnë këtë pension të dinjitetshëm. Duke ditur se fryrja e listave moti e ka tejkaluar dyfish numrin e veteranëve, atëherë prokuroria do të duhej menjëherë të vihej në ruajtje të këtij ligji. Qeveria nuk ka qenë dashur që t’i përfshijë në një listë veteranët dhe manipulatorët”, ka thënë Selimi.

Ai në fund ka theksuar se veteranët e vërtetë nuk e meritojnë të fyhen dhe keqtrajtohen as nga kryeministri i djeshëm apo sot, as nga Mustafa as nga Thaçi./Telegrafi/