Selimi: Gjatë Qeverisë Haradinaj janë rritur investimet e huaja

Këshilltari i kryeministrit në detyrë Ramush Haradinaj, Selim Selimi ka thënë se Qeveria Haradinaj ka përgatitur terrenin për investimet e huaja dhe zhvillimin ekonomik.

Selimi, në “Debat Plus” me Ermal Pandurin në RTV Dukagjini ka thënë se Qeveria Haradinaj ka pasur stabilitet ekonomik dhe ka rritur investimet e huaja dhe të hyrat buxhetore.

“Kemi vendosur parametrat që të kemi ngritje më të madhe ekonomike pasi janë drejtuar investimet ka shtimi i vendeve të punës. Nuk ka askush shkop magjik që të bëj rritje ekonomike 8% apo të bëjë punësimin e kaq apo aq personave”.

Këshilltari i Haradinajt ka thënë se kjo qeveri ka zhvilluar prodhimin vendor sidomos me taksën 100%.

Ai ka thënë se është gabim të presim zhvillim ekonomik nga ndërmarrjet publike përfshirë edhe nga Trepça.

“Për atë arsye Trepçës i është dhënë statusi që të jetë konkurruese në treg. Nuk e ka pasur atë status, i është dhënë”.

Selimi ka thënë se sektori privat duhet t’i prijë zhvillimit ekonomik e jo sektori publik.

Lexo po ashtu Lekaj: LDK, PDK e Vetëvendosje janë kundër Autostradës së Dukagjinit, ta shohim a mund të marrin vota në atë rajon

Ai ka folur edhe për punësimet duke thënë se nuk ka pasur ndonjë ndryshim nga qeverisjet e kaluara madje sipas tij është bërë përzgjedhje më e mirë në borde./Telegrafi/