Salihaj: Demarkacioni në Kuvend, do të kemi tensione të shkaktuara nga PDK-ja

Sjellja në Kuvend e marrëveshjes së Demarkacionit me Malin e Zi nuk është e përshtatshme. Kështu të paktën ka vlerësuar deputeti nga radhët e LDK-së, Adem Salihaj.

“Deputetëve nuk u është thënë se do të vijë Marrëveshja e Demarkacionit në Kuvend. Është thënë se do të vijë raporti i Komisionit për Matjen e Territorit. Por, pavarësisht krejt kësaj, mendoj se nuk janë rrethanat e përshtatshme për ta sjellë Marrëveshjen e Demarkacionit në kuvend”, ka thënë Salihaj për Telegrafin.

Sipas tij nuk është e përshtatshme, për shkak të përpjekjeve të PDK-së për ta anuluar ligjin për Gjykatën Speciale.

Salihaj më tej ka theksuar se situata mund të përkeqësohet dhe se për këtë do të jetë fajtore PDK-ja.

“Demarkacioni nuk bënë të sillet në Kuvend, veçanërisht tash pas përpjekjeve të PDK-se për ta anuluar Ligjin për Gjykatën Speciale. Duhet pritur që rrethanat do të ashpërsohen dhe do të kemi tensione të shkaktuara nga PDK, e cila synon ta instrumentalizoje opozitën për qëllimet e saj”, ka thënë Salihaj.

Ka qenë deputeti i Partisë Demokratike të Kosovës, Nait Hasani i cili ka kërkuar nga kryeministri dhe deputetët që të rikthehet edhe një herë ligji për Gjykatën Speciale dhe që Kuvendi i Kosovës të shqyrtojë edhe një herë, sepse ajo është kundër interesit të Kosovës, kundër familjeve të dëshmorëve.

Ndërkaq veteranët kanë paralajmëruar se nuk do të lejojnë mbajtjen e seancave deri në shqyrtimin e ligjit për Specialen./Telegrafi/