Salih Morina bëhet përfaqësuesi i ri i LDK-së në Komisionin Qendror të Zgjedhjeve

Lidhja Demokratike ka vendosur që Salih Morina të jetë përfaqësues i ri i LDK-së, në Komisionin Qendror të Zgjedhjeve.

Lajmin e ka bërë të ditur vetë Morina, i cili ka thënë se me propozim të kryetarit të LDK-së, Isa Mustafa është propozuar që ta përfaqësoj LDK-në në KQZ.

“Ju njoftoj se unë nuk do të jem kandidat në zgjedhjet e 6 Tetorit. Me propozim të Kryesisë dhe Kryetarit të LDK-së Akademik Isa Mustafa jam propozuar që ta përfaqësoj Lidhjen Demokratike të Kosovës në Komisionin Qëndror të Zgjedhjeve (KQZ).

Dua të falënderoj gjithë strukturat e degës së LDK-së në Malishevë që më propozuan të jem kandidat për deputet nga Lidhja Demokratike e Kosovës.
Gjithashtu dua t’i falënderoj simpatizant e votues të LDK-së për besimin dhe mbështetjen qe i përfaqësova në dy legjislatura të Kuvendit të Kosovës, besim të cilin jam munduar ta kryej me nder dhe përgjegjësi ndaj vendit, subjektit dhe gjithë mbështetësve”, ka shkruar Morina, transmeton Telegrafi.

Kujtojmë se LDK kishte përfaqësues në KQZ, Florian Dushin, mirëpo gjatë ditës ai është larguar nga ky komision. Ai për Telegrafin ka pohuar se do të garojë për deputet të Kuvendit të Kosovës në zgjedhjet e 6 tetorit./Telegrafi/