Sadiku: Janë edhe pesë ndeshje, mund të zëmë së paku vendin e dytë

Ndeshja e radhës e Shqipërisë në kuadër të kualifikimeve për Kampionatin Botëror do të jetë përballë Italisë që organizatorët si për të vështirësuar vajtjen e tifozëve shqiptarë, kanë zgjedhur Palermon si vendin për të zhvilluar këtë ndeshje.

Sulmuesi kuqezi, Armando Sadiku, shpreson se Kombëtarja shqiptare mund të sigurojë pjesëmarrjen në ‘Rusia 2018’, përkundër se nuk gjendet në pozitë të mirë.

“Më ka ardhur shumë keq që luhet në Palermo. Besoj se do të jenë të pranishëm edhe në Palermo, akoma edhe më të shumtë. Ne jemi një popull që kemi mendësi sa do më e madhe të jetë vështirësia, aq më shumë luftojmë për ta kapur. Kështu që besoj që edhe atje do jenë të shumtë shqiptarët”, është shprehur Sadiku në një intervistë për Top Channel.

Lexo po ashtu Sadiku i jep një lajm të mrekullueshëm Shqipërisë (Foto)

“Pas ndeshjes me Izraelin shumë njerëz i kanë humbur shpresat, por unë nuk e shikoj kështu. Kemi edhe pesë ndeshje për të luajtur”.

“E shoh gjithmonë pozitiv, ne mund të marrim fitore apo barazim kundër Italisë. Mund të fitojmë ndaj Izraelit. Mendoj se duhet të përqendrohemi akoma edhe më shumë tek çdo ndeshje”.

“Pastaj ishalla me ndihmën e fatit dhe Zotit të marrim rezultate pozitive. Unë besoj se të paktën mund ta arrijmë vendin e dytë”, ka shtuar sulmuesi. /Telegrafi/