Ukraina dërgon 120 mijë trupa në kufi me Bjellorusinë, i kundërpërgjigjet Lukashenko

Presidenti i Bjellorusisë, Alexander Lukashenko, ka deklaruar se Ukraina kishte vendosur më shumë se 120,000 trupa në kufi me Bjellorusinë e cila i është kundërpërgjigjur duke e vendosur një të tretën e ushtrisë përgjatë gjithë kufirit.

Lukashenko nuk njoftoi se sa trupa saktësisht janë dislokuar.

Por, bëhet e ditur se ushtria profesionale e Bjellorusisë ka rreth 48,000 trupa dhe rreth 12,000 trupa kufitare shtetërore, sipas Bilancit Ndërkombëtar për Studime Strategjike të vitit 2022, shkruan Reuters, përcjell Telegrafi.

“Duke parë politikën e tyre agresive, ne kemi vendosur trupa në pika të caktuara përgjatë gjithë kufirit, në rast lufte”, tha Lukashenko në një intervistë për televizionin shtetëror rus.

Lukashenko, një nga aleatët më të afërt ndërkombëtarë të presidentit rus, Vladimir Putin, tha se kufiri është i minuar “si kurrë më parë” dhe se trupat ukrainase do të pësonin humbje të mëdha nëse do të përpiqeshin ta kalonin atë.

Ministri i Mbrojtjes së Bjellorusisë, Viktor Khrenin, tha se ekziston një probabilitet i lartë i një provokimi të armatosur nga Ukraina fqinje dhe se situata në kufirin e tyre të përbashkët “mbetet e tensionuar”. /Telegrafi/