A rrezikohen integrimet euroatlantike të Maqedonisë së Veriut?

Është e padiskutueshme se vendi do të vazhdojë luftën kundër krimit dhe korrupsionit, por pas deklaratës së ambasadorit francez Christian Thimonier për Alsat M se rasti ‘Haraçi’ mund të ndikojë në vendimin e Francës që ta bllokojë procesin e marrjes së datës për nisje të bisedimeve me BE-në në tetor, një pjesë e analistëve thonë se nuk presin që të ndodh një gjë e tillë.

Ish ambasadori Nano Ruzhin për TV 24 thotë se nuk pret që afera të ndikojë në nisjen e bisedimeve me BE-në për shkak se gjithkund ndodh dhe është vetëm një episodë në tranzicion, përcjell Telegrafi Maqedoni.

“Një skandall i tillë nuk do të ndryshojë shumë, por mund të jetë një leksion i mirë. Maqedonia e Veriut i tejkaloi kriteret kur i nënshkroi marrëveshjet me Bullgarinë dhe Greqinë”, tha Ruzhin duke shtuar se nuk ka asnjë arsye të jemi skeptik.

Në lidhje me pasigurinë e Qeverisë së Spanjës që ende nuk është formuar, dhe Spanja ende si vend i NATO-s duhet ta ratifikojë Protokollin për në NATO, ish ambasadori Ruzhin thotë se ekzistojnë mekanizma tjerë ‘ad-hoc’ që NATO mund t’i zbatojë me Qeverinë që del prej pushteti që të mos pengohet ky proces.

Për analistin Ismet Ramadani, integrimet euroatlantike në vend nuk duhet të ndalohen ndërsa vendi edhe më tej duhet të përqendrohet në proceset reformuese e posaçërisht në pjesën e gjyqësisë dhe drejtësisë.

Reformat në gjyqësi si kusht i integrimeve euroatlantike në vend ishin temë kryesore e takimeve të përfaqësuesve të lartë të BE-së dhe SHBAve, Hahn dhe Reeker në Shkup që takuan krerët shtetëror, pushtetin dhe opozitën./Telegrafi/