Ristevski: Zgjedhja e presidentit në Kuvend, nuk paraqet vullnet të pastër të qytetarëve

Profesori universitar Temellko Risteski, idenë e zgjedhjes së kryetarit të shtetit e vlerëson si zgjedhje efikase, por sipas tij, kjo nuk paraqet vullnet të pastër të qytetarëve.

Ai në një deklaratë për TV21 tha se nuk është e njëjtë kur qytetarët në mënyrë të drejtpërdrejtë përmes votës e shprehin vullnetin e tyre dhe kur deputetët votojnë për ta në Kuvend, përcjell Telegrafi Maqedoni.

“Kur presidenti zgjidhet nga Kuvendi nuk parashtrohet çështja e censusit siç parashtrohet tani, por megjithatë duke pasur parasysh sovranitetin e qytetarëve është më mirë që presidenti i shtetit të zgjidhet nga qytetarët në zgjedhje të drejtpërdrejta, sepse nëpërmjet zgjedhjeve qytetarët drejtpërdrejtë e shprehin vullnetin e tyre për atë se kush do të jetë i pari i shtetit”, theksoi profesori universitar, Temellko Risteski.

Për t’i motivuar qytetarët që të dalin të votojnë me 5 maj, Ristestki tha se është e nevojshme që të punohet më shumë me qytetarët dhe atyre t’u shpjegohet se zgjedhja e presidentit nga ana e tyre është në interesin e tyre. Gjithashtu ai tha se me këtë lëmë përshtypje të mirë edhe tek vendet anëtare të Bashkimit Evropian.

“Duhet të lëmë përshtypje më të mirë tek miqtë e tanë të BE-së, duhet të lëmë përshtypje se behët fjalë për shtet serioz, qytetarë serioz të cilët mendojnë për të ardhmen e tyre .Duhet t’u shpjegohet qytetarëve se na është hapur rruga për BE dhe se anëtarësimi në BE do të thotë perspektive më të mirë dhe të ardhme më të ndritur”, u shpreh Temellko Risteski.

Ndryshe në rrethin e parë dalja ishte 41.79%, ndërsa tani në rrethin e dytë kur në garë janë vetëm dy kandidatë, arritja e censusit duket shumë e vështirë. Siç dihet në rrethin e parë 10.58% e votave shkuan për Blerim Rekën, i cili nuk arriti të kalon në rrethin e dytë./TV21/