Rexhep Selimi thotë se së shpejti do të ketë një epilog në Vetëvendosje

Deputeti i Vetëvendosjes, Rexhep Selimi ka komentuar zhvillimet e fundit dramatike në partinë ku ai bën pjesë.

Selimi duke marrë shkas se këto komente i bëri në ceremoninë përkujtimore të 19 vjetorit të rënies së dëshmorit Mujë Krasniqi dhe bashkëluftëtarëve të tij ka thënë se nuk do të flasë shumë lidhur me këtë çështje.

“Sot kemi shkas tjetër, është dita e dëshmorëve, qëllimi i dëshmorëve është më i rëndësishëm se një debat i brendshëm”.

“Po vazhdon një debat që së shpejti do të ketë një epilog”, ka thënë Selimi në Info Magazine të Klan Kosovës.

Selimi nuk ka dashur t’i komentojë grafitet e sotme “S’ka BABË, ka ide” që vijnë pas zhvillimeve të fundit në Vetëvendosje.

“Nuk i komentoj se nuk jam në dijeni”.

Por deputeti i Vetëvendosjes ka insistuar se krejt këto zhvillime brenda Vetëvendosjes pasqyrojnë vetëm një debat të brendshëm.

“Mund të konfirmoj se po vazhdon një debat i brendshëm që nuk ka ngel vetëm brenda, debatet e tilla për Vetëvendosjen nuk janë të natyrshme, janë për subjektet tjera, prandaj edhe janë bërë lajm”.

Ai ka folur edhe për mbledhjen e Këshillit të Përgjithshëm, dhe faktin se deputetët Vetëvendosjes kanë nisur sot të mbledhin nënshkrimet e anëtarëve për mbajtjen e n jë mbledhje të tillë.

“Këshilli e ka kohën që të ndodhë, jemi afruar në limitet e mbajtjes së këtij Këshilli, qoftë me nënshkrime, apo pa nënshkrime, kjo mbledhje do të mbahet”, tha ai. /Klan Kosova/