Rënie e dërgesave të kompjuterëve në Evropën Perëndimore

Sipas të dhënave të cilat i ka grumbulluar kompania Gartner, dërgesat e kompjuterëve personal në Evropën Perëndimore gjatë çerekut të parë të vitit kanë rënë për 3.1% në krahasim me një vit më parë, në 15.5 milion copë.

Gartner thekson se shitja ishte më e dobët nga ajo e paralajmëruar për shkak të paralajmërimit për sistemet e bazuar në procesorët Ivy Bridge të Intelit. Në të vërtetë, sipas Gartnerit i tërë çereku ishte i shënuar nga pritjet, respektivisht shitoret shtynin porositë e kompjuterëve të rinj derisa të mos arrijnë modelet e bazuar në Ivy Bridge, e i tërë tregu i kompjuterëve personal është në pritje të kompjuterëve të parë të bazuar në sistemin e ri operativ të Microsoftit, Windows 8. Gjithashtu theksohet se shfrytëzuesit e vegjël më shumë janë të orientuar kah pajisjet alternative kompjuterike, siç janë telefonat “e mençur” mobil dhe tabletët.

Prodhuesi udhëheqës i kompjuterëve në tregun e Evropës Perëndimore ende mbetet HP, ndërsa pasohet nga Acer, Asus, Dell dhe Lenovo. /Telegrafi/