Real Madridi, Messi e Ronaldo, Xavi dhe Iniesta, zhgënjimi i Lewandowskit – drejtori i France Football i zbulon të gjitha

Drejtori i France Football, Pascal Ferre, nuk ka zbuluar identitetin e fituesit të ardhshëm të Topit të Artë, i cili do të bëhet i ditur këtë të hënë, dhe përballë statusit të favorit të Karim Benzemas, ai foli se si Real Madrid di se si të orkestrojë rrethanat për të shtyrë lojtarët e tyre drejt çmimit.

“Florentino Perez orkestron mirë rrethanat, në heshtje, pa lëvizje, gjithçka që ai bën është i autorizuar”, deklaroi Ferre në një intervistë për EFE.

Drejtuesi i revistës që e jep çmimin që nga viti 1956 thotë se këto rrethana “nuk të bëjnë të fitosh, por mund të të bëjnë të humbasësh kur ka një mesazh të keq apo një gjest të keq”.

“Ka makineri si Real Madridi që janë shumë të forta. Inteligjenca e tyre është se ata mbështesin një lojtar të vetëm. Për vite ishte Cristiano Ronaldo dhe tani është Karim Benzema. Kjo parandalon që votat të shpërndahen”, thotë ai.

“Ata e dinë se si funksionon. Nuk është rastësi që ata janë klubi që e kanë fituar më shumë herë”, thotë Ferre në zyrën që ka zënë që nga viti 2005.

Jashtë fushës

Ferre kujton se reputacioni jashtë fushës është gjithashtu një kriter kur jepen pikë, por nuk beson se dënimi për bashkëpunim në shantazh të dhënë ndaj Benzemas duhet të jetë një pengesë që ai të bëhet francezi i parë që fiton çmimin që nga Zinedine Zidane në vitin 1998.

“Unë mendoj se kjo tashmë është marrë parasysh nga juritë, por nuk mendoj se është një element thelbësor. Topi i Artë nuk është çmimi Nobel i Paqes, ata kanë votuar për njëmbëdhjetë muaj garë”, shtoi ai.

Rënia e Messit

Për herë të parë në 15 vjet, Lionel Messi, fituesi i shtatë edicioneve, nuk shfaqet në mesin e kandidatëve, “një ngjarje gjigante në historinë e çmimit”, sipas Ferre, i cili konsideron se “Topi i Artë është Messi dhe Messi është Topi i Artë”.

“Rekordi i tij do të jetë shumë i vështirë për t’u arritur, ai është dikush që mishëron mirë Topin e Artë, sepse kombinon performancën individuale dhe kolektive, por edhe një ide të caktuar të spektaklit dhe jetëgjatësisë”, thotë ai. Ai kujton se argjentinasi ishte “shumë i emocionuar” kur e thirri në dy rastet e fundit për të shpallur se ishte fituesi.

“Në 2019-ën më tha se e kishte harruar kënaqësinë e fitimit (tri vitet e fundit), e kishte kuptuar që i kishte marrë malli. Në 2021-shin kisha përshtypjen se po flisja me një fëmijë”, thotë ai.

Emocioni i Cristianos

Ai kujton gjithashtu emocionet e Cristiano Ronaldos kur ai u shpall në disa edicione dhe beson se portugezi “nuk e ka tretur të mbeturin pas rivalit të tij të madh”.

“Është një çmim shumë i rëndësishëm për ta. Topi i Artë është një nga gjërat e pakta që nuk mund të blesh. Ai i bën ata të përulur përballë këtij lloj shpërblimi, i bën ata si fëmijë”, shton ai.

Messi dhe Ronaldo “kanë qenë protagonistë të një prej rivaliteteve më intensive në historinë e sportit”, thotë Ferre, i lumtur që Topi i Artë ka ndihmuar në nxitjen e këtij aspekti, ndërsa mendon se do të kalojë pak kohë që një duel i ngjashëm të përsëritet.

“Flitet shumë për rivalitetin mes Mbappe dhe Haaland, por asnjëri prej tyre nuk e ka fituar Ligën e Kampionëve. Në moshën e Mbappes, Messi kishte tashmë dy Topa të Artë. Nëse ata duan të krijojnë një rivalitet të ngjashëm, duhet të fillojnë duke fituar trofe të mëdhenj tani. Messit dhe Ronaldos nuk u deshën aq shumë”, thotë ai.

Ferre është i vetëdijshëm se Topi i Artë nuk është pa polemika “sepse të gjithë kanë të preferuarat e tyre”, por kur rishikon listën e fituesve ai beson se “nuk ka njeri që e ka turpëruar çmimin”.

Xavi dhe Iniesta, një mbresë

“Unë nuk mendoj se dikush mungon në listë. Është e qartë se disa emra mungojnë. Sipas mendimit tim janë tre, Robert Leëandoëski i Polonisë dhe Xavi Hernandez i Spanjës dhe Andres Iniesta”, pranon ai.

“Për mua është një plagë e madhe, sepse (Xavi dhe Iniesta) janë dy lojtarë të cilët i rendit shumë lart dhe që mishërojnë futbollin siç e sheh Topi i Artë. Por në vitin 2010 ata ishin kundër Messit dhe mendoj se ata paguan për fakti që në atë kombëtare spanjolle votat u ndanë mes shumë emrave, gjë që uli mbështetjen e tyre”.

Ai e di se për shumë, Raul Gonzalez është një tjetër prej atyre që mungon në listën e fituesve, por beson se “ai është një hap më poshtë” dhe kujton se nuk e ka fituar kurrë Kupën e Botës.

Për Lewandowskin, Ferre gjithashtu i vjen keq që polaku nuk e fitoi atë në vitin 2020, kur ai ishte favorit i madh, por France Football vendosi të mos e jepte atë për shkak të pandemisë.

“E bëmë nga dëshira për të qenë të drejtë, jo të gjithë kampionatet ishin ndalur. Roberti vazhdon të më pyesë nëse nuk pendohem, por mendoj se bëmë gjënë e duhur”, thotë ai.

Prej disa ditësh, telefoni i tij nuk pushon. “Përfaqësuesit, klubet, lojtarët… duan të dinë nëse kanë fituar, është e pashmangshme”.

Fituesi i vitit 2022 tashmë e di se do të përqafojë trofeun e artë të hënën e ardhshme. Ferre tashmë ka kaluar në ceremoninë e zakonshme të shpalljes personalisht në shtëpinë e tij.

“Ne përpiqemi ta mbajmë atë sa më të fshehtë. Ndonjëherë maskohemi që të mos na shohë njeri teksa mbërrijmë. Dhe i themi fituesit të mos i tregojë gruas apo fëmijëve të tij”, thotë ai. /Telegrafi/