Reagon Haxhiu: Si ka mundësi të dihet aktgjykimi pa u bërë publik, kjo nuk është pavarësi e Gjykatës

Ministrja në detyrë e Drejtësisë, Albulena Haxhiu ka reaguar lidhur me çështjen e Gjykatës Kushtetuese e cila së shpejti pritet të dalë me vendim rreth dekretit të presidentit.

Ajo ka thënë se qytetarët kanë të drejtë të zemërohen rreth asaj që po ndodh me dekretin e presidentit Hashim Thaçi, përfshirë këtu edhe Gjykatën Kushtetuese.

Haxhiu përmes një postimi në Facebook, ka shtuar se si ka mundësi të dihet aktgjykimi e mënyra e votimit, pa u bërë publik ende nga Gjykata.

“Nëse është kështu, atëherë kjo nuk është pavarësi e Gjykatës. Vendimi i tillë është arnim i aktgjykimit për interesa të Thaçit dhe atyre që kanë humbur zgjedhjet dhe janë braktisur nga populli”, ka shkruar Haxhiu.

Postimi i plotë:

Qytetarët kanë plotësisht të drejtë që të zemërohen. Në njërën anë thuhet “mos ndërhyni në pavarësinë e Gjykatës”, e në anën tjetër orientimet e para të tyre qarkullojnë tek disa, përfshirë edhe në medie!
Si ka mundësi të dihet aktgjykimi e mënyra e votimit, pa u bërë publik ende nga Gjykata?!
Nëse është kështu, atëherë kjo nuk është pavarësi e Gjykatës. Vendimi i tillë është arnim i aktgjykimit për interesa të Thaçit dhe atyre që kanë humbur zgjedhjet dhe janë braktisur nga populli.
Gjykata në mandat të saj, ka vetëm interpretimin e Kushtetutës dhe jo amendamentimin e saj. Amendamente kushtetuese mund të propozojnë vetëm Qeveria, Presidenti dhe 1/4 e deputetëve por pastaj ato duhet të votohen nga Kuvendi.
Sipas Kushtetutës, nuk ka afat për mandatarin. Gjykata nuk mund të caktojë afat. Kjo do ta shkatërronte rendin kushtetues dhe demokracinë.
Kjo do ta përmbysë vullnetin e popullit! /Telegrafi/