Reagimi i Unitedit pas dënimit të Maguire nga gjykata greke

Manchester Unitedi ka njoftuar se vendimi i gjykatës greke për fajësinë e Harry Maguire do të apelohet dhe klubi kërkon seancë të plotë dhe të drejtë në rastin e mbrojtësit anglez.

27-vjeçari është shpallur fajtor për shkaktim të lëndimit trupor, përpjekje të dhënies së ryshfetit, dhunës kundër punonjësve publikë dhe për fyerjes gjatë arrestimit në Mykonos.

Ai i ka hedhur poshtë të gjitha akuzat dhe ishte deklaruar i pafajshëm, megjithatë gjykata greke vendosi kundër tij.

Maguire ka marrë dënim me kusht prej 21 muajsh e 10 ditësh, ndërsa ekipi i avokatëve të tij dhe Unitedi nuk do ta lënë me kaq.

Lexo po ashtu Maguire shpallet fajtor për shkaktim të lëndimit trupor, tentim ryshfeti, dhunë ndaj punëtorëve publikë dhe fyerje

“Manchester Unitedi deklarohet lidhur me vendimin e sotëm (e martë) të gjykatës greke. Harry Maguire është deklaruar i pafajshëm në të gjitha akuzat për kundërvajtje të bëra ndaj tij dhe vazhdon fuqishëm ta pohojë pafajësinë e tij”, thuhet në komunikatën e Djajve të Kuq.

Sipas klubit anglez, ekipit të mbrojtjes nuk i është dhënë kohë e mjaftueshme që të përgatitet për rastin, si dhe kërkesa që procesi të shtyhej, është refuzuar.

Për këtë arsye, si edhe dëshmitë dhe refuzimin e akuzave, ekipi ligjor i Maguire do të bëjë apel ndaj vendimit – thuhet në reagimin e Unitedit. /Telegrafi/