Raportohet për tetë të vdekur në protestat e Kazakistanit

Protestat rreth Kazakistanit kanë lënë të vdekur tetë personel sigurie dhe kanë lënë me lëndime 317 persona, tha një agjenci lajmesh të mërkurën, pasi presidenti Kassym-Jomart Tokayev nuk arriti të shuajë zemërimin publik mbi ndikimin e paraardhësit të tij të fuqishëm.

Sipas medieve të huaja, përcjell Telegrafi, fillimisht të zemëruar nga rritja e çmimit të karburantit për ditën e Vitit të Ri, protestuesit kanë sulmuar dhe djegur ndërtesat shtetërore dhe kanë brohoritur kundër Nursultan Nazabayev, i cili mbajti autoritet të gjerë edhe pse u largua nga posti i presidentit në vitin 2019 pas gati tre dekadash.

Tokayev e shkarkoi atë nga posti i kreut të Këshillit të Sigurisë Kombëtare të mërkurën derisa kabineti i tij gjithashtu dha dorëheqje.

Disa raportime që cituan ministrinë e brendshme të Kazakistanit thanë se policia dhe trupat e gardës kombëtare u vranë dhe u plagosën në disa rajone të martën dhe të mërkurën gjatë trazirave më të rënda të Kazakistanit në më shumë se një dekadë.

Protestuesit morën kontrollin e aeroportit në Almaty, qyteti më i madh i Kazakistanit, tha për reutersnjë burim i njohur me çështjen. Të gjitha fluturimet për dhe nga Almaty janë anuluar. /Telegrafi/