Rama votoi sot në referendumin e socialistëve

Anëtarësia e Partisë Socialiste po voton këtë të shtunë në referendumin e thërritur nga Kongresi mbi çështjen e mandatit të kryetarit.

Dhe për të ftuar anëtarët që të shprehin me votë në referendum mendimin e tyre për këtë çështje, kryeministri Edi Rama ishte ndër të parët që votoi.

Ai u paraqit në njësinë administrative të Dajtit dhe pas hedhjes së fletës së votimit ku i është përgjigjur me “Po” ose “Jo” pyetjes së ngritur në referendum, Rama foli shkurt për mediat.

“Ky është një moment i rëndësishëm jo vetëm për socialistët, pasi është hera e parë që një parti politike në Shqipëri i drejtohet një referendumi. Referendumi u jep mundësi anëtarëve që të bëhen pjesë e marrjes së vendimeve në parti”, tha Rama.

Më tej, kryeministri u ndal edhe tek fushata e anëtarësimeve të reja duke ritheksuar se objektivi është arritja e 150 mijë anëtarëve.

Në Shqipëri, 81500 anëtarë të partisë socialiste janë thirrur sot të votojnë në një referendum për çështjen e mandatit të kryetarit të tyre Edi Rama.

Referendumi u vendos nga Kongresi i mbajtur muajin e kaluar, pas debateve të gjata në gjirin e socialistëve, ku protagonist ishte deputeti kritik Ben Blushi. Kryetari Rama pranoi se ishte shkelur Statuti i partisë me moszhvillimin e zgjedhjeve për kryetarin e ri në vjeshtën e 2013, ndonëse ai këmbënguli se një gjë veprim i tillë nuk do të kishte pasur kuptim në momentin kur socialistët sapo kishin marrë drejtimin e vendit.

Në fletën e votimit socialistët do të duhet t’i përgjigjen pyetjes “Kur Partia socialiste është në qeveri dhe kryetari i saj është kryeministër, a konsiderohet i rinovuar automatikisht mandati i kryetarit?”

Deputeti Blushi, por dhe disa figura të tjera që e mbështesin atë e kanë konsideruar këtë proces në shkelje të statutit të parties, i cili sipas zotit Blushi parashikon se “dy muaj përpara dhe pas kongresit nuk mund të zhvillohen referendume”. Deputeti socialist ka folur dhe për shkelje të shumta, që nga fakti që nuk është publikuar lista e votuesve, të mungesat organizative me mosafishimin e këtyre listave pranë qendrave të votimit apo dhe moslejimin e palës që ka kundërshtuar referendumin që të ketë përfaqësues të saj në komisione.

Blushi gjithashtu ka konsideruar të trukuar dhe numrin e anëtarëve të partisë, prej 81500, të shpallur zyrtarisht javën e shkuar. Sipas tij rregullat e partisë parashikojnë që çdo 100 anëtarë përfaqësohen në kongres me një delegate, dhe në kongresin e marsit pati mbi 940 delegatë, që I korrespondojnë një numri anëtarësie prej afro 94 mijë. Sipas deputetit socialist, diference prej me shumë se 13 mijë anëtarësh, mund të shpjegohej me ndërhyrjet për shkak të frikës së një pjesëmarrjeje të ulët që do ta bënte referendumin të pavlefshëm. Ndërkohë dje nga Dibra, Blushi tha se kutitë e votimit janë mbushur që një ditë më parë.

Nga ana e tij zoti Rama e ka konsideruar referendumin e sotëm si “një ditë të shënuar. Pjesëmarrja e çdo anëtari një kontribut për demokracinë në PS”, shkroi ai në Facebook.