Rama takimin e fundvitit me gazetarët: Deri në 2027 do të tërheqim 1 miliard euro nga BE

Çelja e negociatave për anëtarësim në BE, dalja e Shqipërisë nga monitorimi i asamblesë së KiE-së dhe plani i ri i rritjes së BE në mbështetje të Ballkanit Perëndimor, ishin temat me të cilat kryeministri Edi Rama zgjodhi të niste konferencën tradicionale të fundviti me gazetarët, duke bërë bilancin e sukseseve të vitit 2024.

Duke vlerësuar punës e skuadrës kombëtare në procesin integrimit, kreu i qeverisë theksoi se kjo tregoi cila është në të vërtetë administrata publike e Shqipërisë, që nuk përfaqësohet sipas tij, nga ata që nuk e nderojnë.

“Po e nis me faktin më domethënës të viti që po lëmë pas, çeljen negociatave për anëtarësim në be dhe të dy grup kapitujve shumë të rëndësishëm dhe marrëdhëniet me jashtë. Ky proces i jashtëzakonshëm për nga volumi i punës, intensiteti dhe cilësia do të ishte i pamundur nëse një skuadër e madhe kombëtare e Shqipërisë dhe qindra e qindra punonjës të administratës publike negociatorë nuk do të kishin bërë më parë punën e shkëlqyer me procesin screening ose ndryshe diagnozën e sistemit të RSH në të gjithë fushat,” tha Rama.

“Ecuria e screening, vlerësimet befasuese për mua të KE, të qeverive që ishin tipikisht përfaqësuese të vendeve më skeptike për performancën e skuadrës sonë kombëtare janë shtysë, motivim, fakt shumë domethënës për çfarë është bërë në gjithë këto vite dhe cila është në të vërtetë administrata publike e Shqipërisë. Një administratë që nuk përfaqësohet interpretohet me rastet e atyre punonjësve që për një arsye a tjetër nuk e nderojnë administratën tonë, shtetin tonë e flamurin tonë dhe bëhen objekt i ekspozimeve të sjelljeve veprimeve të tyre të padenja nga mediat dhe drejtësisë. Por nëse shohim të dyja anët e kësaj medaljeje, ana e dukshme për shkak të këtyre ekspozimeve është një pjesë shumë e vogël dhe jo dmth për të kuptuar funksionimin e administratës publike dhe nivelin e drejtimit të punëve të administratës, gjë që u pa qartë dhe për mua ishte një befasi nga ato të mirëpriturat në procesin e ballafaqimit me skuadrën e teknokratëve të Komisionit Europian”, shtoi kryeministri.

Një tjetër sukses për Shqipërinë sipas kryeministrit është dalja pas 29-vjetësh e Shqipërisë nga faza e monitorimit të plotë të Asamblesë së Këshillit të Europës.

“Këtë vit Shqipëria ka dalë pas 29 vjetësh nga faza e monitorimit të plotë të Asamblesë së Këshillit të Europës. Jemi njësoj si të gjitha ato vende me të cilat duam të bashkohemi në familjen europiane brenda kësaj dekade”.

Rama njoftoi gjithashtu se deri në 2027 Shqipëria do të përfitojë rreth 1 miliard euro.

“Së treti Shqipëria është bërë nxitësi dhe ia ka dalë të shtyjë dhe të bëjë të mundur duke u futur në bashkëpunim me vendet e tjera të rajonit, jo vetëm një dialog të pandodhur më parë mes KE, vendeve anëtare dhe vendeve kandidate nga ku doli si rezultat konkret plani i ri i rritjes së BE në mbështetje të Ballkanit Perëndimor. Ka qenë një proces jo i lehtë për të arritur që në procesin tradicional të integrimit të hyjë një element i ri, i cili ka hyrë në fjalor si anëtarësimi gradua. Ne dhe vendet e rajonit kemi në dispozicion një instrument të ri financiar të planit të rritjes ku nga sot deri në 2027 do të thithim rreth 1 mld euro dhe kemi njëkohësisht dritën jeshile për t’u bashkuar me familjen europiane në disa segmente të Europës së bashkuar”.

Po kështu Rama deklaroi se: “Që nga 21 nëntori shqiptarët në të gjithë botën që bëjnë transferta parash nga zona e be drejt Shqipërisë nuk do të kenë asnjë komision extra, se Shqipëria është zyrtarisht anëtare e zyrave të pagesave europiane që kursen miliona euro nga xhepat e dërguesve nga jashtë, brenda perimetrit të BE”.