Qytetarët e përjetojnë rëndë rrahjen e të moshuarës në Pejë: “Kam qarë kur e kam parë videon…, e kam menduar nënën time”

Gjatë së mërkurës artistja Kaltrinë Zeneli ka shpërndarë një video në rrjetet sociale, ku shihet se si një infermiere në Qendrën për të Moshuar “Orenda” në Pejë sulmon fizikisht një grua të moshuar.

Ngjarja, ku u përdor dhuna fizike ndaj të moshuarës, nxiti shumë reagime të shumta, kurse ndaj infermiereve të implikuara në rast (katër sosh) u ndërmorën veprime si nga institucioni ku ato punonin, duke i suspenduar nga puna. Ndërsa, Policia e Kosovës ka arrestuar tri prej tyre.

Pas pamjeve të dhunës mbi të, familja ka tërhequr të moshuarën nga Qendra për të Moshuar “Orenda” në Pejë.

Të shqetësuar me ngjarjen u shprehen edhe qytetarët e Kosovës, të cilët thonë se e kanë përjetuar shumë rëndë, atë kanë parë në video.

Qytetarja Emine Bajrami – Muhadri, tha për Telegrafin se asnjë herë në jetën e saj nuk kishte parë një rast të tillë.

“Rasti i djeshëm ka qenë i tmerrshëm, asnjëherë në jetën time nuk kam parë kësi lloj rasti. E kam menduar nënën time në vendin e plakës shumë e tmerrshme. E kam përjetuar shumë rëndë”, u shpreh ajo.

Ndërsa, Gani Gjigolli, thotë se qytetarët janë lodhur  rastet e dhunës në Kosovë.

“Jemi lodh me këto raste të papranueshme, ishte i tmerrshëm rasti. Shpresoj që të mos përsëriten këto raste më në Kosovë. Nuk e meriton një sjellje të tillë asnjë i moshuar. Nuk e kisha menduar asnjëherë që një motër humaniste me profesion sillet aq keq ndaj një plake të gjorë”, tha ajo.

Të papranueshme dhe të tmerrshme e cilëson sjelljen e infermieres ndaj të moshuarës qytetarja Nifa Kaliqi.

“E pa pranueshme ajo sjellje ndaj një plake të sëmurë dhe në atë gjendje. Tmerr. Kam qarë kur e kam parë sepse e kam menduar nënën time mbrëmë në atë gjendje”, tha ajo.

Alban Nuredini tha se para se gjithash ajo plakë ishte nëna e një dëshmori të rënë për lirinë e Kosovës.

“Pavarësisht të gjithave është një plakë e sëmurë që ka nevojë për kujdes. Pos kësaj është edhe nëna e një dëshmori, falë gjakut të së cilit ne punojmë sot. Nuk janë femrat shqiptare ashtu”, theksoi Nuredini.

Oda e Infermierëve të Kosovës, gjatë ditës së enjte, ka bërë të ditur se ua ka tërhequr licencën infermieres që e rrahu të moshuarën Aurona Pelaj, si dhe tri infermierëve të tjera./Telegrafi/