Qeveria miraton Programin Kombëtar për Mbrojtje Gjithëpërfshirëse

Qeveria e Kosovës sot në mbledhjen e saj ka miratuar Programin Kombëtar për Mbrojtje Gjithëpërfshirëse, program ky i cili siç u tha ka për synim mbrojtjen e vendit nga kërcënimet e brendshme dhe të jashtme, si dhe nga fatkeqësitë natyrore.

Kryeministri i vendit, Albin Kurti para kabinetit qeveritar tha se Ministria e Mbrojtjes ka hartuar Programin Kombëtar për Mbrojtjen Gjithëpërfshirëse të Kosovës.

Sipas tij, mbrojtja e sovranitetit nga kërcënimet e jashtme dhe të brendshme konvencionale dhe jokonvencionale dhe ruajtja e jetës dhe pasurisë së qytetarëve në raste të fatkeqësisë natyrore janë interesa jetike të Republikës së Kosovës.

Ndërkaq, lidhur me këtë program në një konferencë për media ka folur edhe ministri i Mbrojtjes, Ejup Maqedonci.

Ai tha se Mbrojtja Gjithëpërfshirëse është një strategji qeveritare e përfshirjes së mbarë shoqërisë në sistemin e mbrojtjes me qëllim të ruajtjes së interesave jetike të vendit tonë.

“Strategjia e sigurisë së Kosovës e thekson qartë se mbrojtja a sovranitetit territorial nga kërcënimet e jashtme dhe të brendshme ndaj territorit të vendit dhe ruajtjes së jetës dhe pasurisë së qytetarëve në rast të fatkeqësive natyrore janë interesa jetike të Kosovës”, tha ai.

Ministri i Mbrojtjes tha tutje se ky sistem nuk do të ndërhyjë në zhvillimin e gjithmbarshëm të FSK-së, por njëkohësisht u mundëson të gjithë qytetarëve vullnetarisht të kenë rolin e tyre në sistemin e mbrojtjes dhe të sigurisë.

“Pra, përderisa FSK-në po e ndërtojmë dhe zhvillojmë në përputhje me Planin gjithëpërfshirës të tranzicionit, në Programin e mbrojtjes gjithëpërfshirëse po vendosim bazën për përgatitjen e edukimin e  qytetarëve dhe institucioneve në sistemin mbrojtës”, tha ai.