“Qeveria e re të mos na lë pas dore” (Video)

Personat me nevoja të veçanta në Maqedoni kërkojnë nga qeveria e re që mos t’i lë pas dore. Ertan Shaqiri kërkon nga kryeministri i ri që të ndërtojë vend të posaçëm për kalimin e tyre dhe qendra rekreative.

“Mesazhi im është me u taku dhe me biseduar që të ju themi atyre në mënyrë direkte që mos të na harrojnë në gjitha aspektet. Që do të thotë invalidët më së shumti kanë nevojë më së shumti, për rrugë apo për sport ose angazhime tjera”, tha Ertan Shaqiri për TV21.

Suaret Alishan, është pjesë e iniciativës qytetare “5 minuta në 12”, që angazhohet për të drejtat e fëmijëve me nevoja të veçanta. Nga kjo iniciativë shpresojnë se do të zgjidhjen kërkesat e tyre.

“Besojmë se në bashkëpunim me qeverinë lokale dhe atë qendrore, do të formojmë grupe pune. Së bashku do t’i harmonizojmë ligjet për një sërë mungesash të cilat janë pengesë për një jetë më të mirë të kësaj kategorie të fëmijëve”, tha Suaret Alishan, Iniciativa Qytetare “5 minuta në 12”.

Sipas të dhënave të Organizatës Botërore për Shëndetësi, më shumë se një miliardë persona në mbarë botën kanë ndonjë formë të invaliditet. Në Maqedoni konsiderohet se 10 % e popullatës kanë ndonjë invaliditet. Përveç problemeve shëndetësore dhe institucionale me të cilat hasen këta persona, disa nga problemet shtesë janë edhe paragjykimet, margjinalizimi dhe diskriminimi.