Qeveria e Maqedonisë, para me barok pas me gropa dhe baltë (Foto/Video)

Nuk ndalen punimet në Qeveri; për momentin janë duke u vendosur pllakat në oborrin e Qeverisë. Fasada ka kushtuar 9 milion euro, ndërkaq gardhi përreth ndërtesës ka kushtuar 690 mijë euro, sipas vetë qeverisë. Por mbrapa objektit të qeverisë, rruga Jordan Haxhikonstantinov – Xhinot, është në një gjendje tepër të keqe.

Gropa përplot dhe rruga e paasfaltuar. Qytetarët që kalojnë këtë rrugë janë të revoltuar duke thënë se skulpturat dhe fasadat e institucioneve po rregullohen, ndërkaq rrugët, sipas tyre, janë në gjendje katastrofale, njofton Telegrafi.

“Gjithçka po ndërtohet, por ajo që është më e rëndësishme nuk po ndërtohet. Me rëndësi është brenda ta kenë mirë, por qytetarët a duhet të notojnë këtu”?

“Krejt gropa është këtu, paratë i marrin për vete dhe i fusin nëpër xhepa”.

“Çdo ditë kaloj këtu, duhet që të rregullohet. Këtë gjendje e kemi gjithkund nëpër Maqedoni”.

“Nuk është e nevojshme kjo, qyteti jonë ka pasur imazhin e vet, tash fytyra i është ndryshuar.  Mendoj se e gjithë kjo është bërë me dhunë”, u shprehën disa nga protestuesit.

Kjo rrugë është nën kompetencat e komunës Qendër, prej nga thonë se gropat do të mbulohen për dy, tre ditë.  Ndryshe, para disa ditëve qeveria ka paralajmëruar edhe veshjen me barok të objektit të njohur si shtëpia e verdhë që i përket Sekretariatit për çështje evropiane për nevoja të trajnimit. Shtëpia ndodhet pak metra larg selisë së qeverisë qeverisë dhe fasada, siç bëjnë të ditur shërbimet qeveritare, do të kushtojë 170 mijë euro./Telegrafi/

https://www.youtube.com/watch?v=SzMrmSGM4_o