Qeveria e Maqedonisë ofron mbështetje të plotë për investitorët e huaj

Sot, kryeministri Zoran Zaev realizoi takim pune me drejtorin e Delegacionit të ekonomisë gjermane në Republikën e Maqedonisë, Patrick Martens.

Në takim, drejtori Martens shprehu falënderim për vëmendjen dhe përkushtimin që kryeministri Zaev ka treguar ndaj aktivitetit të Delegacionit gjerman, në emër të mbi 200 komapnive anëtare të Bashkësisë së odave gjermane për industri dhe tregti në Republikën Federale të Gjermanisë, përcjell Telegrafi Maqedoni.

Siç kumtoi shërbimi për shtyp i Qeverisë, Martens tha se Delegacioni i ekonomisë gjermane në Shkup, prej para 8 muajve e ngriti statusin e tij për shkak të këmbimit të jashtëzakonshëm pozitiv tregtar midis Republikës së Maqedonisë dhe Republikës Federale të Gjermanisë, por mbi të gjitha edhe si pasojë e proceseve pozitive dhe qasjes reformatore të Qeverisë së re të Maqedonisë.

Nga ana tjetër, kryeministri Zaev tha se kjo konfirmon se përcaktimi i Qeverisë së re është mbështetja e investitorëve të huaj dhe atyre vendorë, sigurimi i garancës ligjore për ndërmarrjet e tyre si dhe qasje të barabartë për të gjitha iniciativat në biznes me shërbime cilësore të institucioneve shtetërore dhe administratës publike, si sinjal motivues për investitorë potencial në Maqedoni.

Kryeministri Zaev poashtu përshëndeti iniciativën e Delegacionit të ekonomisë gjermane për t’ju ofruar komapnive vendase në Republikën e Maqedonisë trajnime profesionale për të punësuarit e tyre, dhe veçanërisht në pjesën për menaxhues në sektoret e industrisë së automatizuar me teknologji bashkëkohore./Telegrafi/