Putini shkarkon komandantin e lartë sepse gënjeu për përparimet ruse në luftën në Ukrainë

Rusia ka shkarkuar një komandant të lartë nga posti i tij për pretendime të rreme për përparimin e luftës në pjesë të Ukrainës lindore, sipas blogerëve ushtarakë dhe mediave ruse.

Gjeneralkoloneli Genadi Anashkin, komandanti i Grupit të Forcave Jugore, u shkarkua pasi dha informacione mashtruese në lidhje me përparimin e Rusisë pranë vendbanimit Siversk në rajonin lindor të Donetskut, sipas blogerëve, shkruan CNN, përcjell Telegrafi.

Media ruse RBC raportoi largimin e Anashkin, duke cituar burime të paidentifikuara brenda Ministrisë ruse të Mbrojtjes, të cilët thanë se ai u hoq si pjesë e një rotacioni të planifikuar.

Megjithatë, nuk ka asnjë konfirmim zyrtar nga zyrtarët rusë.

Forcat ukrainase po përballen me “një nga ofensivat më të fuqishme ruse” që nga fillimi i luftës në vijën e frontit, sipas shefit të ushtrisë së Ukrainës.

Por progresi ka qenë më i ngadalshëm në disa rajone, me shumë vendbanime që janë bërë “sinonim të gënjeshtrave dhe humbjeve të pajustifikuara”, tha Rybar, një nga blogjet më të njohura ushtarake ruse, në Telegram.

“Vetëm dembelët nuk shkruajtën për problemet atje: në përgjithësi, sistemit iu deshën rreth dy muaj për t’u përgjigjur siç duhet”, shtoi Rybar, duke iu referuar vendbanimeve të shumta pranë vijës së frontit që Anashkin dyshohet se gënjeu.

Ndërkohë, disa blogerë pretendojnë se raportet e rreme të bëra nga disa komandantë për situatën në terren kanë çuar në humbje të mëdha midis njësive ruse.

Blogerët ushtarakë janë bërë një burim kyç informacioni që nga fillimi i plotë të agresionit rus në Ukrainë në shkurt 2022.

Shumë prej tyre kanë burime të thella brenda forcave të armatosura të shtetit ose midis separatistëve pro-rusë në Ukrainën lindore. /Telegrafi/