​Proteston personeli mjekësor në Podujevë, paralajmëron bojkot të punës

Para Qendrës Kryesore të Mjekësisë Familjare të Podujevës, kanë protestuar vozitësit, personeli higjienik dhe punonjës të tjerë për mos përfshirje në pagat shtesë prej 300 eurosh për korrik dhe gusht. Ata kanë paralajmëruar bojkotim të punës nëse nuk i marrin shtesat për këta dy muaj.

Kryetari i Sindikatës së punëtorëve të QKMF-së në Podujevë, Sheqir Maliqi tha se mosaplikimi i kësaj shtese për 61 punëtorët e kësaj QKMF-je është diskriminim.

Kreu i Sindikatës po ashtu deklaroi se nëse kërkesat e tyre nuk merren parasysh do të bojkotojnë punë pavarësisht nevojave.

Maliqi tha se përkundër kërkesave të shumta ato nuk janë marr parasysh.

“Ne i kemi dy shoferë të infektuar, kemi punëtor teknik që është me COVID pozitiv, kemi higjienist që është me COVID pozitiv dhe ne e konsiderojmë si një diskriminim. Sot e kemi vetëm një paralajmërim kam kërkuar nga kolegët edhe që të përshkallëzojmë… Ne po kërkojmë që shtesa prej 300 euro për korrik dhe gusht këtyre njerëzve tu paguhet sa më parë që të jetë e mundur përndryshe do e lëmë punën do e bojkotojmë punën me pasojat do të merren ata”, tha ai.

Se nuk do vazhdojnë të punojnë nëse nuk ekzekutohen shtesat e thotë edhe shefi i autoambulancave, Naim Hoxha.

Derisa tregon se tashmë një kolegë i tyre e ka kaluar COVID-it thotë se po ndihen të rrezikuar po aq sa janë edhe stafi mjekësor.

“Të rrezikuar jemi sa ata që i kanë marr pagat jemi edhe ne. Ne e kemi një me COVID që sot e ka fillua punën… këto të fundit nuk i kemi marr ato para kohe i kemi marr…nëse nuk bëjnë këta asgjë ne do e bojkotojmë punën”, deklaroi Hoxha.

E rrezikuar ndihet edhe higjienistja e kësaj QKMF-je, Naxhije Haliti e cila për KosovaPress u shpreh se të gjitha mbeturinat që mbesin pas shërbimeve mjekësore duhet t’i largojë ajo.

“Jemi të rrezikuar si nuk jemi të rrezikuar, kolegen e kemi me COVID. Edhe ne jemi të rrezikuar sepse mbeturinat e gjithçka çka përdorin këta mjekë ne duhet me i largua e me pastrua. Mjeku nuk hynë pa pastrua as tekniku të gjitha ne duhet me i krye njëherë për të shërbye”, theksoi ajo.

Nexhmedin Mahmuti, roje e QKMF-së në Podujevë tha se janë të rrezikuar pasi që ka raste kur në mungesë të dezinfektuese po duhet që me autoambulancën të cilën kanë bartur pacientë me COVID-19, pa e dezinfektuar fare automjetin të bartin pacientë me sëmundje tjera.

“Unë kam qenë pa mbrojtëse pa rroba kur jemi kthyer si rregull për ta dezinfektua kemi shkuar në COVID për ta dezinfektua megjithëse se kemi për detyrë se janë njerëzit e caktuar nuk kemi gjetur dezinfektues ka qenë në mungesë kështu që është dashur me transportuar pacientët e aksidentuar apo çfarëdo gjendje qofshi me sanitet që me herët ka bartur pacientë me COVID”, tha ai.

Të pakënaqur me mospërfshirje janë edhe punëtorët tjerë në Qendrën Klinike Universitare të Kosovës dhe spitalet rajonale.