Protesta në Kolumbi: 79 oficerë policie u morën peng

Një oficer policie ka vdekur dhe 79 të tjerë janë marrë peng gjatë protestave në provincën jugore të Caqueta të Kolumbisë.

Dhuna shpërtheu të enjten pasi banorët bllokuan kompleksin e kompanisë së kërkimit të naftës Emerald Energy.

Ata kërkonin ndihmën e saj për riparimin dhe ndërtimin e rrugëve të reja në zonë.

Një civil u vra gjithashtu dhe nëntë punëtorë të fushës së naftës u kapën së bashku me oficerët e policisë. Video tregonte pengjet të ulur në tokë, të rrethuar nga demonstruesit.

Presidenti kolumbian Gustavo Petro tha se shpresonte se ata do të liroheshin “në mënyrë të njëanshme” përpara çdo përshkallëzimi të dhunës dhe kërkoi ndihmë mjekësore nga Kryqi i Kuq.

Shumë nga protestuesit janë banorë ruralë dhe indigjenë që duan që kompania e naftës të ndërtojë infrastrukturë të re rrugore rreth zonës San Vicente del Caguan.

Emerald Energy nuk u përgjigj kur u kontaktua nga agjencia e lajmeve Reuters.

Policia kolumbiane nderoi në Twitter policin e vrarë në përplasje, i cili quhet Ricardo Monroy.

“Sot jemi më të bashkuar se kurrë”, shkruan ata, duke shtuar se Monroy “ka ofruar jetën e tij në krye të detyrës”.

Qeveria lokale tha se oficeri vdiq nga një sulm me hanxhar, ndërsa civili u vra nga të shtënat me armë. /Telegrafi/