Prokuroria e Prizrenit mban ligjërata në shkolla kundër dhunës në familje

Prokuroria Themelore në Prizren, përkatësisht prokuroret/koordinatore për rastet e dhunës në familje, Mehreme Hoxha dhe Elfete Purova, kanë realizuar ligjërata vetëdijësuese për nxënësit në shkollat “Luciano Motroni” dhe “Hysen Rexhepi” në Prizren.

Ky aktivitet është realizuar në kuadër të fushatës “16 ditët e aktivizmit kundër dhunës në baza gjinore”, raporton Telegrafi

“Nxënësve iu ligjërua rreth konceptit të marrëdhënieve familjare, formave të dhunës në familje, aspektet penale të dhunës në familje, viktimat e ndjeshme, si dhe rolin e institucioneve shtetërore në luftimin e këtyre veprave penale. Ata u informuan gjithashtu, për ndihmën juridike që mund t’u ofrohet nga Qendra për Ndihmë Juridike, për rolin e mbrojtësve të viktimave, etj.”, thuhet në njoftimin e Prokurorisë.

Këto ligjërata, sipas Prokurorisë, kanë për qëllim forcimin e kapaciteteve të nxënësve të shkollave fillore dhe të mesme për të identifikuar dhe raportuar dhunën në familje si dhe dhunën në baza gjinore.

Nxënësit janë njoftuar edhe për sanksionet ligjore që parashihen sipas ligjit për personat që kryejnë vepra penale të dhunës në familje, si dhe vepra tjera penale në kuadër të dhunës në familje, raporton Telegrafi.

“Ligjëratat ishin interaktive dhe nxënësit shprehën interesim të madh gjatë ligjërimit, duke parashtruar pyetje të ndryshme për diskutim”, thuhet në njoftim.

Prokuroria Themelore në Prizren ka bërë të ditur se do të vazhdoj edhe më tej t’i trajtoj me prioritet rastet e dhunës në familje, sikurse edhe mbajtjen e ligjëratave të tilla, me qëllim të vetëdijësimit dhe të parandalimit të veprave penale të dhunës në familje dhe dhunës në baza gjinore. /Telegrafi/