Prokurori Biraj: Nuk e marrim parasysh raportin e ekspertëve të pavarur për rastin Dehari (Foto)

Sot është publikuar raporti i ekspertëve të pavarur lidhur me vdekjen e aktivistit të Vetëvendosjes, Astrit Deharit.

Sipas këtij raporti vdekja e Deahrit ka qenë e dhunshme, e menjëhershme dhe ka ardhur si pasojë e asfiksisë së dhunshme (traumatike).

Lidhur me këtë, avokati Tomë Gashi ka thënë se të gjeturat tregojnë dhe është përfundim logjik se kemi të bëjmë me vrasje dhe jo vetëvrasje.

Ndërkaq prokurori i Departamentit të Krimeve të Rënda në Prizren, Metush Biraj i cili është marrë me hetimet lidhur me vdekjen e Deharit, ka thënë për Telegrafin se nuk e komenton raportin e mjekëve të pavarur.

“Ne kemi dalë me qëndrim zyrtar për rastin Dehari. Tash çfarë bëjnë mjekët e pavarur nuk është çështje që unë duhet ta komentoj”, ka thënë Biraj.

Ai ka shtuar se nuk kanë se çfarë ta marrin parasysh raportin e publikuar sot, pasi që sipas tij tashmë ekziston qëndrimi zyrtar.

“Qëndrimin e mjekëve të pavarur unë nuk e komentoj”, u shpreh Biraj.

Ndërkaq në nëntor të këtij viti, kryeprokurori i Prokurorisë së Prizrenit, Sylë Hoxha kishte prezantuar rezultatin e raportit të autopsisë, ku thuhej se Astrit Dehari është vetëvrarë.

Astrit Dehari, ish-aktivisti i Lëvizjes Vetëvendosje ka ndërruar jetë me 5 nëntor 2016, në Qendrën e Paraburgimit në Prizren./Telegrafi/