Projekti KosLift ndihmon studentët e UP-së, në sektorin e energjisë dhe teknologjisë informative (Video)

Rreth njëmijë studentë dhe 60 biznese kosovare do të mbështeten nga projekti KosLift në sektorët e energjisë, TIK dhe prodhimit, me aftësitë e nevojshme dhe kapacitete për të rritur konkurrueshmërinë e tyre në sektorin e biznesit në Kosovë dhe rajon.

Projekti KosLift që është hapur sot zyrtarisht është një investim 30 mujor dhe mbështetet nga ambasada Norvegjeze në Prishtinë dhe implementohet nga IPKO Foundation dhe RIT Kosova.

Me këtë rast, ambasadori i Norvegjisë në Kosovë, Per Strand Sjaastad, ka thënë se Kosova ka potencial për zhvillimin në TIK.

“Shoh shumë studentë dhe profesorë të motivuar, njerëz në pozita të larta që dëshirojnë ta lëvizin këtë vend. Kurrë s’kam pasur dyshim nëse ia vlen ky projekt, ka qenë lartë në listën time prioritare që nga dita e parë. TIK-u nuk është vetëm sektor, por është edhe një teknologji ndërthurëse tërë dimensionale me ndikim të madh shumë përtej sektorit të vet. Kontribuon edhe rreth 50 për qind të rritjes së produktivitetit në Evropë, dhe kjo është shumë për potencialin që mund ta ketë edhe në Kosovë”, ka thënë ai.

Ndërsa, rektori i Universitetit të Prishtinës, Marjan Dema, ka thënë se ky projekt është shumë i rëndësishëm për të gjithë studentët.

Dema tha se Universiteti i Prishtinës deri tani ka hapur dy qendra të inovacionit.

“Nga ky projekt do të përfitojnë 1000 studentë. Natyrisht që do të themelojmë edhe shumë qendra tjera. Suksesi nuk vjen rastësisht. Pjesëmarrja në një projekt të tillë do të rezultojë në një përfitim për ju”, theksoi ai.

Ndërsa anëtarja e bordit në RIT, Jehona Gjurgjeala, ka deklaruar se ky projekt do të bëjë një lidhje mes studentëve dhe bizneseve.

“Ky projekt do të lidh studentët e UP-së me ata të RIT dhe me bizneset. Është shumë e rëndësishme që të ketë diçka të tillë. Jo vetëm që do të ndahen përvojat por do të bashkërendohen ato”, tha ajo.

Ndryshe, qëllimi i KosLift është rritja e konkurrencës së bizneseve në Kosovë duke rritur cilësinë dhe sasinë e produkteve dhe shërbimeve që ato ofrojnë.

Ky objektiv do të realizohet në tri mënyra:

1. Mbështetje bizneseve kosovare për të zhvilluar produkte dhe shërbime të reja

2. Rritja e gatishmërisë për punë të të rinjve kosovarë duke u ofruar atyre njohuri, shkathtësi dhe aftësi për të punuar në bizneset konkurruese lokale

3. Krijo një përputhje me biznesin, të rinjtë dhe institucionet akademike për të përmirësuar kapacitetet hulumtuese dhe zhvillimore. /Telegrafi/