Profilet e 4 ministrave të rinj që përfshihen për herë të parë në qeverinë Rama

Kryeministri Edi Rama, me ndryshimet e propozuara të hënën në qeveri në mbledhjen e Asamblesë Kombëtare të PS-së, duket se ka pasur një qasje drejt profileve më profesionale sidomos në fushën e diplomacisë, me Igli Hasanin, të financave me Ervin Meten, por edhe me një theks tek menaxhimi, siç është profili i ministres së propozuar tek Shëndetësia, Albana Koçiu. Edhe eksperienca e Arbjan Maznikut si nënkryetar i Bashkisë së Tiranës për 9 vite rresht e ka profilizuar këtë të fundit në postin e ministrit të Shtetit për Pushtetin Vendor.

Kreu i qeverisë ka ruajtur një ekulibër midis zgjedhjeve me karakter profesional dhe atyre me natyrë politike, duke mbajtur në qeveri edhe Manastirliun dhe Ibrahimajn, por duke pasur parasysh se disa ministra në kabinetin e tij qeveritar janë profile të qarta politike, si Balla, Balluku, Peleshi, Manja, Kumbaro etj.

Profilet e 4 ministrave të rinj që përfshihen për herë të parë në qeveri

Igli Hasani, ministër i Jashtëm

Igli Hasani, i propozuar nga Rama si ministër i Jashtëm në vend të Olta Xhaçkës, ndonëse nuk është një emër i njohur në korridoret e politikës, profili i tij është më i theksuar si diplomat karriere.

Ai ka mbajtur pozicionin e Koordinatorit të Aktiviteteve Ekonomike dhe Mjedisore të OSBE-së. Përpara anëtarësimit në OSBE, ambasadori Hasani ka qenë Përfaqësues i Përhershëm i Republikës së Shqipërisë pranë OSBE-së dhe organizatave të tjera ndërkombëtare në Vjenë. Në janar 2021, ai mori postin e Kryetarit të Grupit të Partnerëve Aziatikë për Bashkëpunim.

Gjatë kryesimit shqiptar të OSBE-së, ambasadori Hasani ishte Kryetar i Këshillit të Përhershëm të OSBE-së dhe kryetar i Grupit të Kontaktit Mesdhetar si pjesë e Trojkës së OSBE-së në vitin 2019.

Ambasadori Hasani ka një përvojë 17-vjeçare në Ministrinë e Mbrojtjes së Shqipërisë në role të ndryshme drejtuese, duke përfshirë si Sekretar i Përgjithshëm (2017-2018), Drejtor i Përgjithshëm për Politikat e Mbrojtjes (2015-2017), Drejtor i NATO-s dhe Marrëdhënieve me Jashtë (2013-2014). dhe Drejtor i Integrimeve Euro-Atlantike (2013-2014). Ai ka diplomuar në Drejtësi, Sociologji dhe Filozofi nga Universiteti i Tiranës, Master në Marrëdhënie Ndërkombëtare nga King’s College në Londër, si dhe është diplomuar në Kolegjin Mbretëror të Studimeve të Mbrojtjes.

Ervin Mete, ministër i Financave

Ervin Mete, i cili merr portofolin e ministrit të Financave, në vend të Delina Ibrahimajt, është një emër i njohur në sferat e menaxhimit ekonomik të vendit. Aktualisht është drejtor i Përgjithshëm Ekzekutiv i Autoritetit të Mbikëqyrjes Financiare që nga maji 2020. Më herët ka mbajtur detyrën e Kryetarit të Bordit të Autoritetit, prej shtatorit 2019.

Mete ka shërbyer si zëvendësministër i Financave dhe zëvendësministër i Ekonomisë (2013-2017), përgjegjës për politikën fiskale dhe zhvillimin ekonomik. Gjatë kësaj periudhe ka qenë thelbësisht i përfshirë në reformën e menaxhimit të financave publike dhe modernizimin e kuadrit ligjor fiskal dhe financiar, përfshirë ligjin “Për veprimtarinë e sigurimit dhe risigurimit” dhe ndryshimet në ligjin “Për Autoritetin e Mbikëqyrjes Financiare”.

Ervin Mete ka drejtuar grupin e nivelit të lartë mes Qeverisë dhe Bankës së Shqipërisë për reduktimin e kredive të këqija në sistemin bankar dhe ka mbajtur pozicionin e koordinatorit kombëtar për Programin e Reformave Ekonomike me BE.

Mete është lektor i së drejtës fiskale pranë Shkollës së Magjistraturës. Ai ka shërbyer si ekspert dhe konsulent i Bankës Botërore (2011), Komisionit Evropian (2008) dhe PNUD-it (2007).

Ervin Mete mban gradën Master nga Universiteti i Harvardit, SHBA (LL.M. 2010) dhe nga Shkolla Ekonomike e Londrës (LL.M. 2009), ku është specializuar në të drejtë fiskale dhe të drejtë korporatash. Është diplomuar në Fakultetin e Drejtësisë, Universiteti i Tiranës, me rezultate të shkëlqyera (2006). Z. Mete zotëron gjuhën angleze dhe atë italiane.

Albana Koçiu, ministrja e Shëndetësisë

Në Asamblenë e Partisë Socialiste, kryeministri Edi Rama propozoi Albana Koçiun si ministren e re të Shëndetësisë, duke zëvendësuar në këtë pozicion Ogerta Manastirliun, e cila qëndronte në këtë detyrë që nga viti 2017.

Albana Koçiu aktualisht mban pozicionin e Drejtorit të Departamentit të Administratës Publike që prej vitit 2013. Koçiu ka përfunduar studimet në Fakultetin e Shkencave Sociale, në Universitetin e Tiranës dhe vjen në krye të Departamentit të Administratës Publike pas një eksperience 18-vjeçare në pozicione drejtuese ne administratën qendrore dhe vendore, me fokus të veçantë në fushën e menaxhimit të burimeve njerëzore.

Si drejtuese e Departamentit të Administratës Publike, znj. Koçiu kryeson në nivel teknik procesin e Reformës së Administratës Publike, si një ndër prioritetet e vendit drejt integrimit të Shqipërisë në Bashkimin Europian.

Arbjan Mazniku, ministër i Shtetit për Pushtetin Vendor

Arbjan Mazniku është emëruar ministër i Shtetit për Pushtetin Vendor, dikaster i cili zëvendëson Ministrinë e Shtetit për Standardet dhe Shërbimet. Mazniku ka shërbyer më parë si zv.ministër i Arsimit dhe Sportit, ndërsa nga viti 2015 është nënkryetar i Bashkisë së Tiranës.

Në janar 2008 ai u angazhua me lëvizjen civile MJAFT, duke mbajtur rolin e drejtorit për Politikat e Brendshme dhe drejtor i Komunikimit në strukturat e saj.

Duke pasur nën menaxhim një organizatë private, ai gjithashtu është marrë me studimin dhe analizimin e politikave publike në Shqipëri. Arbjan Mazniku ka studiuar për Gazetari në Universitetin e Tiranës dhe zotëron gradën Master në profilin Komunikim Politik nga Universiteti britanik “Sheffield”./RTSH