Privatizimi mënyrë e mirë që Telekomi të kthehet në binar

Ekspertët e telekomunikacionit dhe ata të fushës së ekonomisë, japin vlerësime të ndryshme rreth privatizimit të Telekomit të Kosovës. Ish-drejtori i PTK-së, Agron Dida vlerëson se menaxhimi jo i mirë, e ka sjellë këtë ndërmarrje buzë falimentimit. Derisa, për Odën Ekonomike Amerikane thonë se privatizimi është mënyra më e mirë, që Telekomi të kthehet në një kompani profitabile.

Eksperti i telekomunikacionit dhe ish- udhëheqësi i Post-Telekomit të Kosovës, Agron Dida, vlerëson se menaxhimi jo i mirë dhe punësimi i njerëzve joprofesionistë, janë disa nga arsyet, që kanë ndikuar, që Telekomi i Kosovës të kërkojë shpëtim në procesin e privatizimit. Në një intervistë për RTK-në, Dida thotë se është dëshmuar, se menaxhimi i dobët, e ka sjellë këtë kompani, ku është tani. Sipas tij, pasojat e kësaj gjendjeje do t’i bartin punëtorët.

“Jo të gjithë. Unë dua me veçuar punëtorë që punojnë me zell, jam i bindur se janë diku rreth 1 mijë punëtorë që punojnë si duhet dhe e mbajnë krejt operacionet. Kusuri që kanë ardhë me të njofshëm, me intervenca, nuk është në rregull. Nuk mundet me funksionuar kështu. Askund në botë, asnjë ekonomi nuk mundet me mbështet kësi operacione. Në qoftëse privatizohet, ai ka mi marr vetëm ata punëtorë që kanë me punuar, të tjerët nuk i duhen”.

Por, Oda Ekonomike Amerikane ka mirëpritur vendimin e qeverisë për fillimin e procedurave për privatizimin e Telekomit të Kosovës. Drejtori Arian Zeka, vlerëson se kjo është mundësia e vetme për kthimin e Telekomit, në ndërmarrje profitabile.

“Duke e parë këtë si mundësinë e vetme në teknologji, në përmirësim të proceseve të punës, edhe kthimin e kësaj ndërmarrjeje, në ndërmarrje profitabile. Procesin si të tillë e kanë karakterizuar edhe disa paqartësi, siç është edhe paralajmërimi për një kredi të mundshme nga ndonjë institucion financiar ndërkombëtarë, në këtë rast nga BERZH-i, për ristrukturim të kësaj ndërmarrjeje”.

Ndryshe, qeveria e vendit, ka marrë vendim që t’i fillojë procedurat për privatizimin e ndërmarrjes publike Telekomi i Kosovës. Sipas ministrit të Zhvillimit Ekonomik, Valdrin Lluka, Telekomi i Kosovës që nga viti 2015 është duke u ballafaquar me një krizë të thellë financiare dhe operative. Përgjatë tri viteve të fundit, humbjet financiare të kësaj ndërmarrjeje shkojnë nga 8 deri në 52 milionë euro në vit, ka thënë mistri Lluka. Ndërkohë zyrtarët thonë se deri më tani, janë katër kompani ndërkombëtare që kanë shprehur interesimin e tyre, për Telekomin e Kosovës. /Telegrafi/