Presidenti i SHBA-së ka frikë se Putini nuk ka “strategji daljeje” nga konflikti në Ukrainë

Presidenti amerikan Joe Biden thotë se ka frikë se Vladimir Putin nuk ka “strategji rrugëdaljeje” nga lufta në Ukrainë.

Duke folur në Uashington DC të hënën, Biden e përshkroi presidentin rus si “një njeri shumë kalkulues”, por pa një strategji daljeje dhe pranoi “Unë po përpiqem të kuptoj se çfarë të bëjmë ne për këtë”, përcjell Telegrafi.

Ai tha se Putin gabimisht kishte besuar se pushtimi i Ukrainës do të shpërbënte NATO-n dhe Bashkimin Evropian.

Lexo po ashtu Biden nënshkruan urdhrin që përshpejton procesin e dërgimit të armëve në Ukrainë

Por ai tha se në vend të kësaj, Shtetet e Bashkuara dhe shumë vende evropiane në fakt ishin mbledhur në anën e Ukrainës dhe ishin bërë më të unifikuar.

Komentet optimiste të presidentit Biden për unitetin evropian, megjithatë, erdhën pasi udhëheqësi francez Emmanuel Macron lëshoi një paralajmërim të ashpër ndaj Ukrainës mbi shpresat e saj për t’u bashkuar me BE-në.

Gjatë një fjalimi për Ditën e Evropës në Strasburg, Francë, presidenti Macron tha se kishte frikë se procesi do të zgjaste “për dekada”.

Ai shtoi: “Ne të gjithë e dimë shumë mirë se procesi i lejimit të anëtarësimit (Ukrainës) do të zgjaste disa vjet, në fakt ndoshta disa dekada”. /Telegrafi/