Presidenti premton shtëpi të re për familjen malazeze

Presidenti i Kosovës Hashim Thaçi sot qëndroi në fshatin Gorazhdec të Pejës, ku vizitoi familjen Deshoviq, të përkatësisë nacionale malazeze.

Vizita në këtë familje, djali i së cilës Dimitrije Deshoviq është pjesëtar i Policisë së Kosovës, është bërë me rastin 10 vjetorit të pavarësisë së Malit të Zi.

Kësaj familje ai i ka premtuar një shtëpi të re.

“Sot jam në familjen Deshoviq për të shikuar për afër nevojat e tyre problemet në një fshat ku jetojnë edhe qytetarë tjerë. Edhe në Gorazhdec, por edhe përreth qytetarët kanë jetuar pa dallime etnike. Kam besim të plotë që do të investojmë së bashku për të ndërtuar Kosovën e re. U informova edhe për nevojën që të kenë një shtëpi të re dhe u zotova që të marrim hapa për krijimin e një shtëpie dhe sot mund të them se renda një muaji do të vëmë gurthemelin për një shtëpi të re për familjen. Jam i zotuar t’iu shërbej gjithë komuniteteve, por më tepër jam në një vizitë vëllazërore dhe shumë miqësore”, tha Thaçi, raporton KP.

Kryefamiljari Millovan Deshoviq, tha se është i lumtur që presidenti i vendit po kujdeset për komunitetin malazez.

“Shpresoj që malazezët si komunitet do të përfshihen në Kushtetutën e Kosovës të jenë edhe këta popull shtetndërtues. Ajo që do të thoja në këtë kohë që jetojmë ne ajo që është më e rëndësishme është liria, ne nuk kemi probleme dhe shpresojmë që do të rregullohen edhe gjërat tjera”, tha Deshoviq.

Bashkë me presidentin Thaçi në Gorazhdec ka qëndruar edhe ambasadori i Malit të Zi në Kosovë, Radovan Milaniq, i cili e falënderoi presidentin Thaçi për interesimin e tij për këtë komunitet.

“Familja Deshoviq është ndër familjet e pakta që kanë mbet në rrafshin e Dukagjinit pasi ka pas shumë më shumë në këtë pjesë. Një vizitë e tillë do të pritet mirë edhe në Malin e Zi. Vizita e Thaçit është dëshmi e konsideratës që e ka me Malin e Zi”, tha Milaniq.

Me këtë rast presidenti premtoi se edhe malazezët do të jenë pjesë e Kushtetutës së Kosovës me fillimin e ndryshimeve në këtë dokument.

Thaçi, i pyetur nga gazetarët foli edhe për disa fëmijë të komunitetit malazez të cilët ishin vrarë vite më parë. Ai tha se herëdokur akterët do të dalin para drejtësisë ndërsa në lidhje me Demarkacionin me Malin e Zi, sipas tij ka pas takime edhe me qytetarë dhe se të gjithë duan që ky proces të përfundojë sa më parë.

Thaçi tha se Demarkacioni me Malin e Zi nuk do të bëhet në interes të asnjë parti e apo grupi të caktuar por vetëm në interes të shtetit të Kosovës./Telegrafi/