Presidenti kroat, Millanoviq: Kosovës t’i jepet statusi i kandidatit për pranim në BE

Presidenti kroat, Zoran Milanoviq ka mbështetur kandidaturën e Ukrainës për në Bashkimin Evropian, por propozoi edhe statusin e kandidatit për Bosnje-Hercegovinën dhe Kosovën si dhe fillimin e negociatave me Shqipërinë dhe Maqedoninë e Veriut.

I pari i shtetit të Kroacisë ka pohuar se Ukrainës duhet t’i jepet statusi i kandidatit për anëtarësim në Bashkimin Evropian sa më shpejt të jetë e mundur.

Milanoviq deklaroi se duhet bërë gjithçka për të parandaluar përhapjen e krizës në Ballkanin Perëndimor dhe të shmanget çdo kërcënim i mundshëm jo vetëm për vendet tona fqinje, por edhe për Republikën e Kroacisë.

“Interesi strategjik dhe kombëtar i Kroacisë është që vendet e Evropës Juglindore, të cilat kanë deklaruar dhe dëshmuar synimin dhe gatishmërinë e tyre për anëtarësim në BE, të bëhen anëtarë të Bashkimit Evropian sa më shpejt të jetë e mundur”, tha presidenti.

Lexo po ashtu Presidenti kroat, Milanoviq: Serbia është e dobët, me çka do ta sulmojë Kosovën - me armë prej ujit?

Prandaj, presidenti Milanoviq u sugjeroi nismëtarëve të letrës së hapur që të aplikojnë për statusin e kandidatit në BE si për Bosnje-Hercegovinën, ashtu edhe për Kosovën, raporton denvnik.hr.

Gjithashtu BE-ja pas premtimeve të përsëritura të fillojë menjëherë negociatat për anëtarësim e Maqedonisë së Veriut dhe Shqipërisë. Ai beson gjithashtu se negociatat me Malin e Zi duhet të përshpejtohen.

Ai i dërgoi edhe një mesazh të rëndësishëm Serbisë, “Sa i përket Serbisë, në këtë moment të rëndësishëm për paqen evropiane, ai vend duhet të vendosë nëse dëshiron anëtarësim real në BE apo jo dhe të ndjekë politikën e tij në përputhje me rrethanat. BE-ja duhet t’i bëjë të ditur se ky është momenti i vendimit”.

Ndryshe, Milanoviq ditë më parë kishte pohuar se Beogradi është dobët për ta sulmuar Kosovën, mbi të gjitha “Me çka do ta sulmojë? Me armë prej ujit”. /Telegrafi/