Presidenti i Dritës flet për investimet e klubit në sezonin në të cilin e fituan titullin

Titulli kampion në Kosovë, ishte diçka e papritur edhe për vetë presidentin e Dritës, Valon Murseli. Kreu i intelektualëve i kishte vendosur si objektiv kryesor skuadrës për këtë sezon futbollistik, kualifikimin në Ligën e Evropës, pra vendin e dytë në kampionat.

Fitimi i kampionatit ishte një bonus i madh për të gjithë edhe për vetë presidentin klubit, transmeton SuperSport.

“Në fillim të kampionatit jemi ulur me kryesinë dhe kemi folur çfarë presim nga Drita dhe lojtarët e trajneri. Dëshira ishte dalja në Evropë, titulli ishte i dyti”.

“Kishim qenë të kënaqur edhe me vendin e dytë. Para dy viteve kemi bërë shumë gabime, dolëm kampion, por kishte eufori dhe i harruam lojtarët si Fazliu dhe iku Rexha, por këtë sezon jemi përgatitur për këto gjëra”.

Lexo po ashtu Drita merr trofeun e Superligës në duar - pamje nga festa e tyre në Suharekë

“Dua t’ju them se lojtarët e huaj cilësorë nuk po vijnë në Kosovë. Ata po hezitojnë të luajnë në Kosovë. Nuk ka infrastrukturë për të sjellë yje këtu. Pra ky është problemi. Ne mundemi të sjellim lojtar cilësorë, por 34 vjeç, të rinjtë dhe të mirët nuk mund të sjellim”.

“E kemi nis me 200 mijë euro investime në vitin tjetër e kemi rrit me 600 mijë dhe këtë sezon me mbi një milion euro”, citohet të ketë thënë Murseli.