Botë Nga Bota

Politika ndaj Kinës: Maas mbështet dialogun në vend të kërcënimeve

Para 5 vitesh

Ministri i Jashtëm gjerman Maas e kundërshton një anulim të samitit BE-Kinë për shkak të “ligjit të sigurisë” për Hong Kongun. Ai thotë se nevojitet të ulemi në tryezë me Kinën “për të diskutuar çështjet e pakëndshme”.

Në konfliktin lidhur me “ligjin e sigurisë” për Hong Kongun, Ministri i Jashtëm i Gjermanisë Heiko Maas mbështet një dialog me Kinën dhe jo kërcënime me sanksione. “E kaluara ka treguar se, mbi të gjitha, është e rëndësishme të kemi një dialog me Kinën,” tha Maasi përpara një konference me video të ministrave të Jashtëm të BE. Kur BE shfaqet i bashkuar ndaj Kinës dhe nuk ndahet, kjo mund të ketë një efekt.

Sido që të jetë, pozicioni i BE-së është i qartë, tha Maas. Shkalla e lartë e autonomisë së Hong-Kong-ut dhe liritë e qytetarëve nuk duhet të “minohen”. Qëndrimi i BE ka qenë gjithmonë se “kjo nuk duhet të lëkundet” dhe se duhet të respektohet sundimi i ligjit. Ministrat e BE përsëri do ta “shprehnin këtë shumë qartë”.

Jo anulim i samitit

Megjithë kritikat masive për “Ligjin e Sigurisë”, qeveria gjermane aktualisht nuk mendon të anulojë samitin BE-Kinë në Leipzig në 14 Shtator. “Ka shumë gjëra për të cilat duam të bisedojmë me Kinën,” tha Maas. Samiti BE-Kinë i planifikuar për në shtator është një mundësi e mirë për këtë. Për shembull, qëllimi është të bëjmë përparim real në marrëdhëniet e ndërsjella përmes një marrëveshjeje ambicioze investimi. Samiti ofron gjithashtu mundësinë e kërkimit të nevojës së objektivave ambicioze për klimën nga Kina.

Pyetjes për një anulim të mundshëm të samitit Maasi iu përgjigj me fjalët: “Mund të arrish edhe në rezultatin e kundërt dhe të thuash se pikërisht atëherë Bashkimi Evropian duhet të bashkohet në një tryezë, në mënyrë që të diskutohen tema të pakëndshme me njëri-tjetrin “.

Të Gjelbrit kërkojnë qëndrim më të ashpër

Të Gjelbërit bënë thirrje për një sinjal të qartë nga Qeveria gjermane dhe BE drejt Kinës. Kancelarja Angela Merkel dhe Maas duhet “të heqin dorë përfundimisht nga heshtja e tyre” kundër kreut të shtetit Xi Jinping dhe të sigurojnë një përgjigje të përbashkët evropiane, kërkuan zëdhënësja e të gjelbërve për të drejtat e njeriut, Margarete Bause dhe Jürgen Trittin, anëtar i Komisionit të Punëve të Jashtme.

Kongresi Popullor i Kinës miratoi të enjten një “ligj sigurie” për Hong Kongun. Kritikët besojnë se ai do të kufizojnë ashpër të drejtat civile në Rajonin Special Administrativ. Ligji është krijuar për të kriminalizuar “shkëputjen”, “përmbysjen”, “terrorizmin” dhe “rrezikimin e sigurisë kombëtare” dhe për të lejuar hapur autoritetet kineze të sigurisë kontinentale të vendosen në Hong Kong.

Detajet e ligjit pritet të përpunohen në qershor. Pastaj ai do të hyjë në fuqi duke anashkaluar parlamentin e Hong Kongut.

Projektligji është shkelja më e përhapur në autonominë e ish-kolonisë së kurorës britanike, ku ka pasur demonstrime të forta kritika ndaj Kinës për muaj me radhë. Në plan ndërkombëtar planet e Kinës janë kritikuar ashpër. Shtetet e Bashkuara madje po shqyrtojnë sanksione. /DW/