Policia Shqiptare del me bilanc për kaosin e shkaktuar nga tifozët e Feyenoordit

Finalja e Ligës së Konferencë mes Romës dhe Feynoord luhet sonte në stadiumin “Arena Kombëtare” në Tiranë. Kjo ka bërë që kryeqyteti të mbushet plot me tifozë italianë e holandezë të cilët kanë ardhur për të mbështetur ekipet e tyre. Mirëpo, mbrëmja e djeshme nuk ka qenë aspak e qetë.

Tensione të shumta ka pasur mes tifozëve dhe forcave të rendit. Për pasojë janë dëmtuar 10 punonjës Policie dhe është dëmtuar një automjet policie.

Pas këtij kaosi, shërbimet e Policisë kanë shoqëruar në ambientet e Policisë 60 shtetas nga grupet e tifozëve të dyja skuadrave, 48 shtetas italianë dhe 12 shtetas holandezë.

Lexo po ashtu Pasi shkatërrojnë makinën e policisë, tifozët holandezë përfundojnë në festë

Njoftimi i policisë:

Mbrëmjen e djeshme, një grup tifozësh kanë lëvizur në drejtim të stadiumit “Air Albania” dhe sipas informacioneve tentonin të përplaseshin me një grup tifozësh të skuadrës tjetër.

Shërbimet e Policisë kanë tentuar t’i ndalojnë në rrugën “Mustafa Matohiti”, ku tifozët e skuadrës Feyenoord, në mënyrë të dhunshme kanë goditur punonjësit e Policisë me shishe qelqi, shkopinj, gurë dhe sende të tjera të forta.

Më pas, një grup tjetër tifozësh, të skuadrës së Romës, kanë lëvizur në drejtim të urës së DVP Tiranë ku dhe atje janë përplasur me shërbimet e Policisë duke përdorur gurë, shishe e shkopinj.

Lexo po ashtu Dhunë në rrugët e Tiranës, tifozët holandezë përplasen me policinë shqiptare - ka të lënduar

Si pasojë e dhunës së ushtruar nga tifozët e të dy skuadrave, janë plagosur 10 punonjës Policie dhe është dëmtuar një automjet policie.

Shërbimet e Policisë kanë bërë të mundur shpërndarjen e tyre si dhe kanë shoqëruar në ambientet e Policisë 60 shtetas nga grupet e tifozëve të dyja skuadrave, 48 shtetas italian dhe 12 shtetas holandez dhe vijon shoqërimi i personave të tjerë, të përfshirë në akte të dhunshme.

Policia e Shtetit bën thirrje për shmangien e veprimeve të dhunshme, që nuk manifestojnë asnjë lidhje me sportin.

Lexo po ashtu E rrahën keq një shqiptar, tetë tifozë të Feyenoordit përfundojnë të arrestuar

Policia e Shtetit është e vendosur për të garantuar rendin dhe sigurinë, për të parandaluar shkatërrimin e pronës si dhe për të garantuar mbarëvajtjen e aktivitetit sportiv që do të zhvillohet në “Air Albania”. Dhe për këtë ka marrë të gjitha masat që parashikon ligji.

Policia e Shtetit kërkon mirëkuptimin e qytetarëve që të mos provokohen nga individë apo grupe tifozësh që mund të jenë nën efektin e alkoolit dhe të njoftojnë menjëherë në 112 dhe Komisariatin Dixhital çdo tentativë të prishjes së rendit dhe sigurisë. /Telegrafi/