Policia në terren rreth situatës me të reshurat e shiut, probleme do të ketë në rajonin e Mitrovicës

Derisa ende ka të reshura të dobëta shiu dhe prurjet e ujit në lumenj janë të larta, angazhimet policore janë të vazhdueshme në monitorim, ndihmë qytetarëve dhe raportim për situatën në teren.

Policia e Kosovës përmes një njoftimi thekson se sipas raportimeve nivel më të shtuar të ujërave si pasojë e reshjeve të ditëve të fundit ka në pjesën veriore dhe veri-perëndimore të vendit.

Tutje bëhet e ditur se nga raportimet e rregullta që dërgohen nga njësitet policore nga tereni, të shtunën probleme si pasojë e ujërave atmosferike ka në rajonin e Mitrovicës, përkatësisht në rrugën Pestovë-Druare–Prelluzhe-Plemetin të komunës së Vushtrrisë dhe rrugët  ‘2 Korriku’ dhe ‘Hoxhë Hasan Tahsini’, në komunën e Mitrovicës Jugu dhe në Lagjen e Boshnjakëve në Mitrovicë, veri ku ka nivel të rritur të ujit.

“Nga raportimet e fundit nga rajonet tjera nuk ka situata ku lumenjtë kanë dalë nga shtrati ose të ketë vërshime. Policia apelon tek qytetarët që për çdo rast të kërkesave për ndihmë të thërrasin në numrat përkatës të institucioneve si policia, AME, komunat përkatëse, apo zjarrfikësit”, thuhet në njoftimin e Policisë së Kosovës. /Telegrafi/