Policia konfiskon 22 kilogram drogë, arrestohen dy persona në Vlorë

Policia e Vlorës ka arrestuar dy persona, meqë njëjtit janë kapur me 22 kilogram kanabis, dhe ka sekuestruar këtë lëndë narkotike. Fatjon Zykaj, 30 vjecar, dhe Pajtim Basho, 50 vjecar, janë personat që kanë poseduar drogën, të cilën sot policia e ka sekuestruar në makinën dhe banesat e të dyshuarve.

“Duke udhëtuar në aksin rrugor pranë fshatit Resulaj, në drejtim të Selenicës, me automjetin tip “Audi A-3” me targë: Vl5011C, në pronësi të shtetasit: Fatjon Zykaj, janë kapur në flagrancë në ndjekie nga Policia, pasi gjatë një kontrolli të ushtruar në këtë automjet, është konstatuar një sasi me lëndë narkotike prej 19 kg e 400 gr, të llojit “Cannabis sattiva” (fshehur në bagazhin e këtij mjeti, mbështjellë me thasë prej thurje).

Gjatë kontrollit të ushtruar në banesën 3-katëshe të shtetasit: Fatjon Zykaj, në fshatin Resulaj, Shërbimet e Policisë kanë gjetur një sasi me lëndë narkotike prej 820 gr, të llojit “Cannabis sattiva” (fshehur në katin e 2-të të kësaj banese).

Gjithashtu, gjatë kontrollit të ushtruar në banesën e shtetasit: Pajtim Basho, në Bashkinë Selenicë, Shërbimet e Policisë kanë gjetur një sasi me lëndë narkotike prej 2 kg e 100 gr, të llojit “Cannabis sattiva” (futur në një çantë sportive dhe fshehur në një kuti kartoni)”, thuhet në njoftimin e policisë.

Policia ka bllokuar dhe sekuestruar në cilësinë e provës materiale, 22 kilogram e 320 gram lëndë narkotike të llojit “Cannabis sattiva”, një automjet të tipit “Audi A-3”me targa VL5011C, dhe tre telefonë mobil.