Policia kërkon bashkëpunim për identifikimin e një personi

Policia e Kosovës ka dalë me një kërkesë për bashkëpunim me qytetarët për identifikimin e një personi, i cili është me nevoja të veçanta.

Në njoftimi e policisë thuhet se me datën 24.07.2024 rreth orës 13:30 në Stacionin Policor në Rahovec është shoqëruar një person, në dukej i mitur, i cili është gjetur në fshatin Xerxë-Rahovec, i vetëm, pa ndonjë dokument identifikimi.

“ I njëjti duket se është me nevoja të veçanta pasi që nuk ka aftësi komunikuese”, thuhet në njoftimin e Policisë, transmeton Telegrafi.

“Edhe përkundër angazhimeve policore, nuk është arritur të gjenden të dhëna për identitetin e tij. Andaj, Drejtoria Rajonale e Policisë në Gjakovë, me autorizimin e prokurorit  të shtetit  lëshon kërkesë për bashkëpunim me qytetarë për identifikim e personi të paraqitur në fotografi”.

Drejtoria Rajonale e Policisë në Gjakovë, kërkon nga qytetarët e Republikës së Kosovës, kushdo që ka informacion për identitetin, adresën apo ndonjë informacion lidhur me personin  e paraqitur në fotografinë e bashkangjitur, të lajmërojnë policinë, qoftë përmes numrave të telefoni 192, 080019999 (pa pagesë) dhe 045/930-220, apo përmes aplikacionit “lajmëro policinë” , e-mail info@kosovopolice.com si dhe në stacionin më të afërt policor.