Plenkoviq: Vjosa Osmani javën e ardhshme viziton Zagrebin

Kryeministri i Kroacisë, Andrej Plenkoviq, ka thënë sot para Samitit të Komunitetit Politik Evropian në Granada se është e rëndësishme të shihet reagimi i Bashkimit Evropian në lidhje me ngjarjet e 24 shtatorit në Banjskë.

Siç raportojnë mediat, Plenkoviq u tha gazetarëve se presidentja e Kosovës Vjosa Osmani kishte kërkuar të takohej me të dhe se ajo do të vizitojë Zagrebin javën e ardhshme.

“Ajo që është e rëndësishme është të shohim se cili është reagimi i BE-së, presim propozimin e Komisionit Evropian dhe përfaqësuesit të lartë të Borrellit, se si të reagohet ndaj minikrizës në veri dhe incidentit të rëndë në Banjskë. Një situatë e tillë nuk mund të mbetet pa reagim”, tha Plenkoviq, transmeton Telegrafi.

Ai tha se në Samit do të diskutohet për energjinë, migracionin dhe çështjen e zgjerimit.

“Për Kroacinë është e rëndësishme që të mbështesim Bosnjën dhe Hercegovinën, por edhe vendet e Evropës Juglindore dhe Ukrainën dhe Moldavinë, në mënyrë që të arrihet përparim dhe që progresi të bazohet në suksesin e vendeve”, theksoi Plenkoviq. /Telegrafi/