BE planifikon të mbështesë Ukrainën me një paketë ndihme prej 1.2 miliard eurosh

Bashkimi Evropian synon të ndihmojë Ukrainën me një paketë ndihme financiare prej 1.36 miliardë dollarësh për të zbutur efektet e konfliktit me Rusinë, e cila ka grumbulluar trupa dhe armë të rënda në kufirin e Ukrainës.

Sipas medieve të huaja, përcjell Telegrafi, ka qenë shefja e Komisionit të BE-së, Ursula von der Leyen, ajo që tha të hënën se paketa e ndihmës financiare ka për qëllim “të ndihmojë Ukrainën tani që të adresojë përshkallëzimin e saj të shpejtë në nevojat e financimit për shkak të konfliktit”.

“Komisioni propozon një paketë të re të ndihmës makro-financiare urgjente prej 1.2 miliardë eurosh (1.36 miliardë dollarë)”, tha von der Leyen në Bruksel, duke shtuar se paketa do të përbëhet nga kredi emergjente dhe grante.

Von der Leyen, e cila foli me presidentin ukrainas Volodymyr Zelenskiy të premten, u kërkoi vendeve anëtare të BE-së dhe Parlamentit Evropian që të miratojnë ndihmën “sa më shpejt të jetë e mundur”.

Ajo u bëri thirrje gjithashtu partnerëve ndërkombëtarë si Fondi Monetar Ndërkombëtar (FMN) që të ndjekin të njëjtën qasje dhe të rinovojnë angazhimin e tyre me Ukrainën.

Vetë Komisioni Evropian pothuajse do të dyfishojë ndihmën e tij dypalëshe në grante për Kievin këtë vit, duke shtuar 135 milionë dollarë të tjerë mbi 180 milionë dollarët e planifikuar tashmë, tha ajo. /Telegrafi/