Përplasje pozitë-opozitë në Komunën e Gostivarit, kontestohet kryertari i Këshillit Komunal

Pozita e kryetarit të Këshillit komunal ka shkaktuar përplasje në mes të pozitës dhe opozitës në komunën e Gostivarit.

Kryetari i tanishëm i Gostivarit ka sjellë vendim për ndalimin e publikimit në Vendimit për zgjedhjen e kryetarit të Këshillit të Komunës së Gostivarit në Gazetën Zyrtare me arsyetimin se i njëjti nuk është marrë në përputhje me Ligjin për Vetëqeverisje Lokale, Statusin e Komunës, si edhe me Rregulloren për punë të Këshillit të Komunës së Gostivarit, njofton Telegrafi Maqedoni.

Më tej, në arsyetimin e këtij vendimi Komuna sqaron se propozimi është dhënë nga Komisioni për verifikim, çështje mandatore, zgjedhje dhe emërime që nuk është kompetent për të propozuar kandidatin për pozitën e kryetarit të këshillit.

Nga ana tjetër, Dega e BDI-së në Gostivar ka reaguar ndaj këtij veprimi duke konsideruar se kryetari i tanishëm i Gostivarit nuk e respekton vullnetin e qytetarëve duke vënë në pkëpyetje vendimin e shumicës së këshillëtarëve të Gostivarit.

Sipas kësaj dege, kryetari i tanishëm nuk respekton as ligjet në fuqi, duke sjellë një vendim të këtillë me dhjetë ditë vonesë. Dega e BDI-së kërkon që të respektohet vendimi i datës 17 nëntor, 2017, kur u votua për kryetar të Këshillit Komunal të Gostivarit./Telegrafi/