Peach: Marrëveshja Kosovë-Serbi e nevojshme sa më parë – nismat rajonale të jenë gjithëpërfshirëse

I Dërguari i Posaçëm i Britanisë së Madhe për Ballkanin Perëndimor, Sir Stuart Peach, vlerëson se vazhdimi i situatës pa zgjidhje në mes të Kosovës dhe Serbinë shkon në dëm të dyjave vendeve dhe që çon ujë në mullirin e atyre që duan stagnim.

Peach në intervistë ekskluzive për KlanKosova.tv ka thënë se kjo e bën të nevojshme marrëveshjen në mes të dyja vendeve.

“Sipas meje një marrëveshje gjithëpërfshirëse, përfundimtare dhe e qëndrueshme në mes Kosovës dhe Serbisë është e nevojshme sa më parë që të jetë e mundur: saktësisht kur arrihet ajo, është në dorën e palëve”, është shprehur ai.

Lexo po ashtu Kurti takoi emisarin e britanik për Ballkanin Perëndimor, flasin për dialogun dhe ndikimin rus në rajon

Ai më tej ka folur edhe për nismat rajonale, si “Ballkani i Hapur”, e ku ka theksuar se në to të gjitha vendet duhet të jenë të barabarta.

“Mirëpres nismat që janë në mbështetje të bashkëpunimit rajonal, integrimit ekonomik dhe hapjes së tregjeve, të cilat ofrojnë përfitime reale për rajonin në tërësi. Është e domosdoshme, sidoqoftë, që të gjitha këto procese të jenë gjithëpërfshirëse dhe të hapura për të gjashtë vendet e Ballkanit Perëndimor në kushte të barabarta. Ekziston gjithashtu nevoja për dekonflikt, dhe për të siguruar skema të reja që plotësojnë iniciativat ekzistuese”, është shprehur ai.

Peach ka thënë se Britania e Madhe mbështet Kosovën për anëtarësim në Këshillin e Evropës, derisa ka shtuar se inkurajojnë pesë vendet mosnjohëse të BE-së që ta njohin pavarësinë e Kosovës.